نائب صدر فیفا اور ایشین فٹبال کنفیڈریشن (اے ایف سی) کے صدر شیخ سلمان بن ابراہیم الخلیفہ نے اسلام آباد میں پاکستان فٹبال فیڈریشن (پی ایف ایف) کے زیرِ اہتمام مشترکہ پریس کانفرنس سے خطاب کیا۔ اس موقع پر وزیراعظم یوتھ پروگرام کے چیئرمین رانا مشہود احمد خان بھی موجود تھے۔
رانا مشہود نے شیخ سلمان بن ابراہیم الخلیفہ کی پاکستان آمد کا خیرمقدم کرتے ہوئے کہا کہ وہ فٹبال کے فروغ کے لیے دنیا بھر میں نمایاں خدمات انجام دے رہے ہیں۔
مزید پڑھیں: فیفا کے سینیئر نائب صدر شیخ سلمان بن ابراہیم کی پاکستان آمد، ’اسٹیٹ گیسٹ‘ کا درجہ دے دیا گیا
ان کے مطابق پاکستان کے نوجوان باصلاحیت ہیں اور حکومت انہیں کھیل سمیت تمام شعبوں میں مواقع فراہم کر رہی ہے۔
رانا مشہود احمد خان نے بتایا کہ وزیراعظم کے اسپورٹس ہنٹ پروگرام میں 23 کھیلوں پر توجہ دی جا رہی ہے، اور حکومت فٹبال فیڈریشن کے ساتھ مل کر ملک بھر میں ٹیلنٹ کی تلاش کا عمل تیز کرے گی۔
مزید پڑھیں: سعودی فٹ بال ٹیم کی بڑی کامیابی، فیفا ورلڈ کپ 2026 کے لیے کوالیفائی کرلیا
اس موقع پر شیخ سلمان بن ابراہیم الخلیفہ نے پاکستان کی میزبانی پر شکریہ ادا کرتے ہوئے کہا کہ انہیں یہاں آ کر خوشی ہوئی ہے۔ ان کا کہنا تھا کہ فٹبال دنیا کا سب سے زیادہ مقبول کھیل ہے اور پاکستان میں بھی اس کھیل کے فروغ کے لیے بے پناہ مواقع موجود ہیں۔
شیخ سلمان نے یقین دلایا کہ ایشین فٹبال کنفیڈریشن پاکستان میں فٹبال کے فروغ کے لیے ہر ممکن تعاون کرے گی۔ پاکستان میں ٹیلنٹ کی کوئی کمی نہیں، ضرورت صرف مواقع اور بنیادی ڈھانچے کو بہتر بنانے کی ہے۔
