پاکستان کی نامور ماہرِ تعلیم، محقق، ادیبہ اور فکری رہنما پروفیسر ڈاکٹر عارفہ سیدہ زہرا لاہور میں انتقال کر گئی ہیں۔
پاکستانی ادبی و علمی حلقوں میں گہرے دکھ کی لہر دوڑ گئی۔ معروف ڈرامہ نگار اور شاعر اصغر ندیم سید نے ان کے انتقال کی تصدیق کرتے ہوئے گہرے رنج و افسوس کا اظہار کیا۔
مزید پڑھیں: داستاں سرائے، راجا گدھ اور بانو آپا
ڈاکٹر عارفہ سیدہ زہرا ایک روشن دماغ، ایک مؤقر آواز، اور اردو زبان و تہذیب کی متحرک ترجمان تھیں۔ انہوں نے گورنمنٹ کالج لاہور سے ایم اے اردو اور یونیورسٹی آف ہوائی سے تاریخ میں ڈاکٹریٹ کی ڈگری حاصل کی۔ وہ فارمن کرسچن کالج میں پروفیسر اور لاہور کالج فار ویمن یونیورسٹی کی سابق پرنسپل رہ چکی تھیں۔
انا للہ وا انا اللہ راجعون۔
عارفہ سیدہ زہرہ ادب،تہزیب،شائستگی،علم کا خزانہ چوڑ کر رخصت ہوئیں۔ pic.twitter.com/P96jlnpSZl— Syed Faraz Darvesh (@FarazDarvesh) November 10, 2025
ڈاکٹر عارفہ سیدہ نے نہ صرف تدریس بلکہ سماجی، ثقافتی اور فکری مکالمے میں بھی نمایاں کردار ادا کیا۔ وہ خواتین کی حیثیت سے متعلق قومی کمیشن کی چیئرپرسن اور پنجاب کی نگران صوبائی وزیر بھی رہیں۔
مزید پڑھیں: معروف شاعر و محقق پروفیسر ڈاکٹر نذیر تبسم دوران مشاعرہ انتقال کرگئے
ان کی علمی بصیرت 7 زبانوں پر عبور، تہذیبی شعور، اور فہم و فراست سے آراستہ تھی۔ انہوں نے اپنی زندگی تعلیم، تحقیق، خواتین کے حقوق اور قومی زبان کے فروغ کے لیے وقف کر دی۔
ان کے لیکچرز، خطابات اور مکالمے نسلِ نو کے لیے روشنی کا مینار بنے رہیں گے۔ ادبی و علمی حلقوں نے ڈاکٹر عارفہ سیدہ زہرا کے انتقال کو ’علم و فہم کے ایک عہد کا خاتمہ‘ قرار دیا ہے۔
صدرِ مملکت آصف علی زرداری کا معروف ماہرِ تعلیم اور ادیبہ ڈاکٹر عارفہ سیدہ زہرا کے انتقال پر اظہارِ افسوس
ڈاکٹر عارفہ سیدہ زہرا کی وفات پاکستان کے علمی و ادبی حلقوں کے لیے ایک ناقابلِ تلافی نقصان ہے، صدرِ مملکت آصف علی زرداری
صدرِ مملکت آصف علی زرداری نے معروف ماہرِ تعلیم، دانشور اور ادیبہ ڈاکٹر عارفہ سیدہ زہرا کے انتقال پر گہرے رنج و غم کا اظہار کیا ہے۔
مزید پڑھیں: عینی آپا تھیں تو پاکستانی
صدرِ مملکت نے اپنے تعزیتی پیغام میں کہا کہ ڈاکٹر عارفہ سیدہ زہرا کی وفات پاکستان کے علمی و ادبی حلقوں کے لیے ایک ناقابلِ تلافی نقصان ہے۔
انہوں نے کہا کہ مرحومہ نے اپنی پوری زندگی علم، تحقیق، تدریس اور خدمتِ انسانیت کے لیے وقف کر کے ایک روشن مثال قائم کی۔
صدر زرداری نے کہا کہ ڈاکٹر عارفہ سیدہ زہرا کی علمی خدمات اور قومی زبان کے فروغ کے لیے ان کی کاوشیں ہمیشہ یاد رکھی جائیں گی۔ انہوں نے مرحومہ کے اہلِ خانہ، شاگردوں اور علمی برادری سے دلی ہمدردی اور تعزیت کا اظہار کیا۔
صدرِ مملکت نے دعا کی کہ اللّہ تعالیٰ مرحومہ کو جوارِ رحمت میں جگہ دے اور لواحقین کو صبرِ جمیل عطا فرمائے۔
