معروف جرمن ٹریول ویلاگر وائلڈ کارلوس پاکستان میں اپنی پہلی آمد کے تجربات کے بارے میں ایک ویڈیو میں کراچی ایئرپورٹ سے ہی پاکستانیوں کی مہمان نوازی کے گن گاتے نظر آتے ہیں۔
انہوں نے بتایا کہ پاکستان کا ماحول ان کے لیے حیران کن طور پر پرامن اور پرسکون تھا، ان کے مطابق یہاں کے لوگ بہت دوستانہ اور مہمان نواز ہیں۔
یہ بھی پڑھیں: ’پاکستان جیسی میزبانی دنیا میں کہیں نہیں‘ غیر ملکی سیاح وطن واپسی پر رو پڑے، ویڈیو وائرل
پاکستان میں اپنے ابتدائی تاثرات کا ذکر کرتے ہوئے انہوں نے کہا کہ یہ تجربہ ان کے لیے انتہائی خوشگوار رہا۔ کارلوس نے بتایا کہ وہ جب ایئرپورٹ پہنچے تو پہلے دن انہیں کسی چیز کی قیمت ادا نہیں کرنی پڑی، حتیٰ کہ پاکستانی پولیس نے انہیں دعوت بھی دی۔
View this post on Instagram
وائلڈ کارلوس ایک غیر ملکی ٹریول ویلاگر ہیں جو مختلف ممالک کی سیر کے تجربات شیئر کرتے ہیں۔ پاکستان میں ان کی ویڈیوز وائرل ہوئیں، خاص طور پر اس وجہ سے کہ انہوں نے پاکستانی عوام کی غیر معمولی مہمان نوازی اور ان کی مہربانی کی تعریف کی۔
ان کے مطابق پاکستانی لوگ انہیں ’مہمان، نہ کہ سیاح‘ کے طور پر دیکھتے ہیں، اور انہیں مفت کھانا اور سفری سہولیات کی پیشکش کی گئی۔ ’یہ پاکستان ہے! آپ کچھ بھی کرلیں یہ آپ کو پیسے ادا نہیں کرنے دیں گے۔‘
انسٹا گرام کے لیے بنائی گئی ایک مختصر ویڈیو مونٹاج میں دیکھا جاسکتا ہے کہ کراچی سے لاہور تک انہیں ایک بریانی اور برگر سے لے کر کافی اور سموسے تک کسی نے بھی انہیں پیسے ادا نہیں کرنے دیے۔
کارلوس کی ویڈیوز میں عموماً ایسے سفر کے تجربات دکھائے جاتے ہیں جن میں محدود یا بالکل بغیر پیسوں کے سفر کرنے کے چیلنجز شامل ہوتے ہیں۔
انہوں نے پاکستان میں اپنے تجربات کا موازنہ بھارت کے سفر سے بھی کیا، جہاں ان کے مطابق مقامی دکانداروں کی جانب سے انہیں اضافی چارجز کے مسائل کا سامنا کرنا پڑا، جس سے ان کے مطابق واضح ہوتا ہے کہ بھارت میں سیاحوں کے ساتھ رویہ مختلف ہو سکتا ہے۔
وائلڈ کارلوس کا مواد انسٹاگرام اور یوٹیوب جیسے پلیٹ فارمز پر دستیاب ہے، جہاں انہیں لاکھوں فالوورز کی حمایت حاصل ہے، ان کی ویڈیوز دنیا بھر کے لوگوں کو مختلف ثقافتوں اور سفر کے منفرد تجربات سے روشناس کراتی ہیں۔
