چیف جسٹس آف پاکستان(سی جے پی) نے آڈیو لیکس کمیشن کے خلاف دائردرخواستوں کی سماعت کے لیے لارجر بینچ تشکیل دے کر سماعت مقرر کر دی ہے۔ لارجر بنچ جمعہ کو 11 بجے سماعت کرے گا۔
سپریم کورٹ رجسٹرار آفس سے جاری بیان میں کہا گیا ہے کہ آڈیو لیکس انکوائری کمیشن کی تشکیل کے خلاف دائردرخواستوں کی سماعت اور مقدمے کو نمٹانے کے لیے چیف جسٹس عمرعطا بندیال کی سربراہی میں پانچ رکنی لارجربینچ تشکیل دے دیا گیا ہے۔
چیف جسٹس آف پاکستان عمر عطا بندیال کی سربراہی میں 5رکنی لارجر بنچ جمعہ کو صبح 11بجے دائر درخواستوں کی سماعت کرے گا۔
جسٹس عمر عطا بندیال کی سربراہی میں قائم کردہ بنچ میں جسٹس اعجاز الاحسن، جسٹس منیب اختر، جسٹس حسن اظہر رضوی اور جسٹس شاہد وحید شامل ہیں۔
آڈیو لیکس کمیشن کے خلاف درخواستیں صدر سپریم کورٹ بارعابد زبیری اور سیکرٹری بارمقتدراخترشبیراور وکیل حنیف راہی نےدائرکی ہیں، چیئرمین پاکستان تحریک انصاف (پی ٹی آئی) عمران خان بھی درخواست گزاروں میں شامل ہیں۔
حکومت نے ججز کی آڈیو لیکس کے معاملے پرتحقیقات کے لیے کمیشن قائم کیا ہے جس کی سماعت جسٹس قاضی فائزعیسیٰ کی سربراہی میں 3 رکنی بینچ کر رہا ہے۔ جسٹس قاضی فائز عیسیٰ کی سربراہی میں قائم تین رکنی بنچ میں چیف جسٹس بلوچستان ہائیکورٹ جسٹس نعیم، چیف جسٹس اسلام آباد ہائی کورٹ جسٹس عامر فاروق شامل ہیں
واضح رہے کہ آڈیو لیکس کمیشن معاملے کی ایک سماعت بھی کرچکا ہے جب کہ دوسری سماعت ہفتہ 27 مئی کو مقرر کی گئی ہے۔ آڈیو لیکس کمیشن نے 4 افراد کو کمیشن کے روبرو طلب کر رکھا ہے۔
گزشتہ سماعت کے دوران کمیشن نے ایک حکم نامے کے تحت بلوچستان ہائیکورٹ کے ڈپٹی رجسٹرار حفیظ اللہ خجک کو کمیشن کا سیکرٹری مقرر کیا تھا۔
