وفاقی وزیر داخلہ محسن نقوی نے غیر قانونی امیگریشن میں ملوث مافیا کے خلاف سخت اور بلاامتیاز کارروائیاں جاری رکھنے کی ہدایت کی ہے۔ انہوں نے کہا کہ انسانی اسمگلنگ میں ملوث عناصر کسی رعایت کے مستحق نہیں ہیں۔
یہ ہدایات انہوں نے اسلام آباد میں منعقد ہونے والے ایک اجلاس کی صدارت کرتے ہوئے دیں، جس میں ایف آئی اے کے امیگریشن ونگ کی کارکردگی کا تفصیلی جائزہ لیا گیا۔
پاکستان کی ساکھ پر کوئی سمجھوتہ نہیں ہوگا
وزیر داخلہ محسن نقوی نے کہا کہ پاکستان کی عالمی ساکھ کو کسی بھی صورت نقصان نہیں پہنچنے دیا جائے گا۔ انہوں نے واضح کیا کہ انسانی اسمگلنگ جیسے جرائم ملک کے وقار کو متاثر کرتے ہیں، اس لیے ان کے خلاف زیرو ٹالرنس پالیسی اپنائی جائے۔
یہ بھی پڑھیے پاکستان اور یورپی یونین کے درمیان غیر قانونی امیگریشن اور انسانی اسمگلنگ روکنے پر اتفاق
محسن نقوی نے ایف آئی اے کو ہدایت کی کہ امیگریشن قوانین پر مؤثر انداز میں عملدرآمد یقینی بنایا جائے اور ہوائی اڈوں پر امیگریشن چیکنگ کے نظام کو مزید مضبوط کیا جائے تاکہ غیر قانونی سرگرمیوں کا بروقت تدارک کیا جا سکے۔
پیشہ ور بھکاری مافیا کے خلاف کریک ڈاؤن کا حکم
اجلاس میں پیشہ ور بھکاری مافیا کے خلاف کارروائی پر بھی غور کیا گیا۔ وزیر داخلہ نے اس مافیا اور اس کے سہولت کاروں کے خلاف مؤثر کریک ڈاؤن کا حکم دیتے ہوئے کہا کہ اس نیٹ ورک کو ہر صورت ختم کیا جائے۔
