رمضان کے لیے زیادہ مؤثر اور شفاف پیکج، وزیراعظم شہباز شریف نے ہدایت کردی

وزیراعظم شہباز شریف نے ہدایت کی ہے کہ تمام متعلقہ محکمے آئندہ رمضان کے لیے گزشتہ سال سے زیادہ مؤثر اور فائدہ مند پیکج تیار کریں۔

اسلام آباد میں رمضان پیکج کے حوالے سے اجلاس کی صدارت کرتے ہوئے انہوں نے کہا کہ غریب اور عام آدمی کی مالی مدد اور سماجی فلاح و بہبود حکومت کی اولین ترجیحات میں شامل ہے۔

ڈیجیٹل والٹس کے ذریعے امداد، وقار اور شفافیت کی ضمانت

وزیراعظم نے خصوصی ہدایت دی کہ رمضان پیکج کے تحت امداد کی تقسیم ڈیجیٹل والٹس کے ذریعے کی جائے تاکہ مستحقین کی عزت و وقار محفوظ رہے۔

یہ بھی پڑھیے رویتِ ہلال ریسرچ کونسل کی رمضان اور عیدین سے متعلق فلکیاتی پیشگوئی

انہوں نے کہا کہ ڈیجیٹل والٹس کے ذریعے امداد کی تقسیم کیش لیس معیشت کے قیام کی طرف ایک اہم قدم ثابت ہوگی۔

مستحقین کی زیادہ سے زیادہ شمولیت اور مانیٹرنگ

وزیر اعظم نے تمام متعلقہ وزارتوں اور محکموں کو ہدایت دی کہ امداد کے حصول میں مستحق افراد کی شمولیت کو زیادہ سے زیادہ یقینی بنایا جائے۔

انہوں نے کہا کہ ڈیجیٹل ڈیش بورڈ اور منظم مانیٹرنگ سسٹم بھی نافذ کیا جائے تاکہ پیکج کی مؤثر نگرانی ممکن ہو۔

گزشتہ سال کی شفافیت کی تعریف

وزیراعظم نے گزشتہ سال کے رمضان پیکج کی شفافیت کی تعریف کی، جس کا ذکر معروف آڈٹ فرم کی رپورٹ میں بھی آیا۔

یہ بھی پڑھیے رمضان المبارک اور عیدالفطر 2026 کی ممکنہ تاریخیں سامنے آگئیں

انہوں نے کہا کہ وفاقی حکومت نے گزشتہ سال سے ایک شفاف نظام قائم کیا ہے، جس کے تحت مستحق افراد کو ضروری اشیائے خورونوش سبسڈائزڈ ریٹس پر فراہم کی جاتی ہیں۔

یوٹیلیٹی اسٹورز کا پرانا نظام ختم، شفاف نظام نافذ

وزیر اعظم نے کہا کہ ملک میں طویل عرصے تک یوٹیلیٹی اسٹورز کا نظام مالی بے ضابطگیوں، بدانتظامی اور غریبوں کے استحصال کا شکار رہا، جسے حکومت نے شفاف نظام سے تبدیل کر دیا ہے۔