وفاقی حکومت نے بجلی صارفین کے لیے خوشخبری دیتے ہوئے اعلان کیا ہے کہ اوسط بنیادی ٹیرف میں کسی قسم کا اضافہ نہیں کیا جائے گا۔
نیشنل الیکٹرک پاور ریگولیٹری اتھارٹی (نیپرا) کی سماعت کے دوران پاور ڈویژن کی بریفنگ کے بعد یہ فیصلہ کیا گیا کہ صارفین پر اضافی بوجھ نہ ڈالنے کے لیے اوسط بنیادی ٹیرف برقرار رکھا جائے۔
مزید پڑھیں: عوام سے غیرفعال ہزاروں میگا واٹ بجلی کے کھربوں روپے وصول کیے جانے کا انکشاف
ایڈیشنل سیکریٹری پاور ڈویژن نے بتایا کہ بجلی کی قیمتوں میں اضافے سے بچنے کے لیے سبسڈی میں ضروری ایڈجسٹمنٹ کر دی گئی ہے، جس کے باعث ٹیرف بڑھانے کی ضرورت نہیں رہی۔
پاور ڈویژن کے حکام کے مطابق جولائی سے اب تک انرجی مکس میں نمایاں بہتری آئی ہے، جس سے پیداواری لاگت کم ہوئی اور عوام کو ریلیف فراہم کرنا ممکن ہوا۔
حکام نے اس بات پر زور دیا کہ حکومت نے تمام حالات کا جائزہ لینے کے بعد ٹیرف میں کوئی ردوبدل نہ کرنے کا حتمی فیصلہ کیا ہے۔
مزید پڑھیں: سینیٹ دفاعی کمیٹی کا اجلاس، کوئٹہ کے ہوائی کرایوں اضافے اور چترال پروازوں کی معطلی پر تشویش
واضح رہے کہ ملک بھر میں مختلف کیٹیگریز کے بجلی صارفین کو مجموعی طور پر 629 ارب روپے کی سبسڈی دی جا رہی ہے تاکہ بجلی عوام کے لیے سستے نرخوں پر دستیاب رہے۔
