پاک فوج کے ترجمان کے مطابق، 4 اور 5 فروری 2026 کو خیبر پختونخوا کے مختلف اضلاع میں 2 الگ الگ آپریشنز کے دوران بھارتی حمایت یافتہ خوارج کے 24 دہشتگرد ہلاک کر دیے گئے۔
مزید پڑھیں: خیبر پختونخوا میں دہشتگردی کے خاتمے کا عزم، صوبائی ایپکس کمیٹی کا جامع لائحہ عمل طے
ایک آپریشن اورکزئی ڈسٹرکٹ میں انٹیلیجنس معلومات کی بنیاد پر کیا گیا، جس میں 14 دہشتگرد ہلاک ہوئے۔ دوسرا آپریشن خیبر ڈسٹرکٹ میں کیا گیا، جس میں 10 مزید دہشتگرد مؤثر طریقے سے ختم کر دیے گئے۔
پاک فوج کے ترجمان نے کہا کہ علاقے میں باقی دہشتگردوں کو ختم کرنے کے لیے کلیئرنس آپریشنز جاری ہیں اور ملک میں غیر ملکی حمایت یافتہ دہشتگردی کے خاتمے کے لیے عزم استحکام کے تحت انسداد دہشتگردی کی مہم پوری شدت سے جاری رہے گی۔
وزیرِاعظم شہباز شریف کی اورکزئی اور خیبر میں فتنہ الخوارج کے خلاف کامیاب آپریشن پر سیکیورٹی فورسز کی پزیرائی
وزیرِاعظم محمد شہبازشریف نے اورکزئی اور خیبر کے اضلاع میں فتنہ الخوارج کے خلاف کامیاب کارروائیوں پر سیکیورٹی فورسز کے افسران اور جوانوں کی پیشہ ورانہ صلاحیتوں کو سراہا ہے۔
مزید پڑھیں: وفاق اور خیبر پختونخوا میں اختلافات کیا ہیں، کیا وہ وزیراعظم اور سہیل آفریدی کی ملاقات سے ختم ہوجائیں گے؟
وزیرِ اعظم نے آپریشنز کے دوران 24 خارجیوں کو ہلاک کرنے پر سیکیورٹی فورسز کی جرات، مہارت اور قربانیوں کی تعریف کی اور کہا کہ دہشتگردی کے عفریت کے مکمل خاتمے تک اس کے خلاف جنگ جاری رکھی جائے گی۔
انہوں نے کہا کہ عزمِ استحکام کے ویژن کے تحت دہشتگردوں کے ناپاک عزائم کو ناکام بنانے کے لیے حکومت، سیکیورٹی فورسز اور پوری قوم متحد ہے اور اس قومی جدوجہد میں پوری قوم اپنی فورسز کے شانہ بشانہ کھڑی ہے۔
صدر آصف علی زرداری کا خیبر پختونخوا میں کامیاب آپریشن پر سیکیورٹی فورسز کو خراجِ تحسین
صدرِ مملکت آصف علی زرداری نے خیبر پختونخوا میں انٹیلیجنس بیسڈ آپریشنز کے دوران سیکیورٹی فورسز کی کامیابیوں کو سراہا۔
صدر زرداری نے کہا کہ دہشتگرد عناصر کے خلاف مؤثر کارروائیوں میں 24 خوارج ہلاک ہونا ایک قابلِ قدر کامیابی ہے۔
انہوں نے مزید کہا کہ بیرونی مداخلت کی وجہ سے ہونے والی دہشتگردی کے خلاف جنگ کامیابی سے جاری ہے اور دہشتگردی کے عفریت کے ملک سے مکمل خاتمے تک یہ جنگ جاری رہے گی۔
