پاکستان تحریک انصاف (پی ٹی آئی) نے وزیر اعظم شہباز شریف کی جانب سے دہشت گردی سے نمٹنے کے لیے مشاورت کی غرض سے بلائے گئے ایپکس کمیٹی کے اجلاس میں شرکت نہ کرنے کا اعلان کردیا۔
واضح رہے کہ وزیراعظم نے جمعہ کو پشاور میں منعقد ہونے والے ایپکس کمیٹی کے اجلاس میں شرکت کے لیے تمام سیاسی جماعتوں کو دعوت دی تھی جس پر پی ٹی آئی نے فوری کوئی جواب نہیں دیا تھا تاہم اب سابق اسپیکر قومی اسمبلی رہنما اسد قیصر نے واضح کیا ہے کہ ان کی پارٹی اجلاس میں شرکت نہیں کرے گی۔
شرکت نہ کرنے کی وجوہات پر روشنی ڈالتے ہوئے اس قیصر نے کہا کہ ایک تو پی ٹی آئی پہلے ہی امن و امان کی صورتحال کے حوالے سے احتجاج کی کال دے چکی ہے اور دوسری بات یہ ہے کہ حکومت کے ہاتھوں پارٹی رہنماؤں کی گرفتاریاں جاری ہیں ایسی صورت میں ان کے ساتھ اجلاس میں بیٹھنا ممکن نہیں۔
اس قیصر کا کہنا تھا کہ حکومت نے پی ٹی آئی کو صرف رسمی طور پر دعوت دی ہے اور یہ کسی چیز میں مخلص اور سنجیدہ نہیں۔ اپنی بات کی وضاحت کرتے ہوئے انہوں نے کہا کہ حکومت ایک طرف تو ہمیں دعوت دے رہی ہے جبکہ دوسری جانب ہمارے خلاف گرفتاریوں کا سلسلہ بھی برپا کیے ہوئے ہے اس لیے ہم حکومت کے بلائے گئے کسی اجلاس میں کس طرح شریک ہوجائیں۔
وزیراعظم محمد شہباز شریف آج پشاور میں ایپیکس کمیٹی کے اجلاس کی صدارت کی صدارت کر ہے ہیں جس میں پشاور پولیس لائنز کی مسجد میں ہونے والے دہشت گردی کے واقعہ کے محرکات پر غور کیا جائےگا۔ جلاس میں دہشت گردی کے خاتمہ سمیت سی ٹی ڈی اور پولیس کی آپ گریڈیشن کے اقدامات پر بھی مشاورت کی جائے گی۔
اجلاس میں وفاقی وزرا، چاروں صوبوں, گلگت بلتستان کے وزرائے اعلیٰ، آزاد جموں و کشمیر کے وزیراعظم، سیکورٹی فورسز , پولیس کے حکام اور اعلیٰ سرکاری افسران بھی شرکت کریں گے۔
