سابق راہبہ اور معروف مصنفہ کیرن آرمسٹرانگ نے کہا کہ حضرت محمد ﷺ نے معاشرے کو اپنے بہترین اخلاق کے ذریعے بدلا تھا، انہوں نے مسلمانوں کو عبادات سے زیادہ ایک نظریے اور اخلاق کا درس دیا۔
معروف عرب ٹیلی ویژن چینل ’الجزیرہ‘ کے پروگرام میں گفتگو کرتے ہوئے کیرن آرمسٹرانگ نے کہا کہ اسلام نے ہمیشہ عبادات کے ساتھ ساتھ نظریے اور اخلاق کا درس دیا ہے، یاد رکھیے کہ نظریہ اور اخلاق آپ کے سوچنے اور سمجھنے کی صلاحیت کو بدل کے رکھ دیتا ہے۔
سابق راہبہ کیرن آرمسٹرانگ نے کہا کہ برسوں پہلے قرآن کی چند آیات نے مجھ پر ایسا اثر ڈالا کہ میں نے اسلام میں دلچسپی لینا شروع کر دی، میں اسلام پر 3کتابیں لکھ چکی ہوں جن میں سے 2آخری نبی حضرت محمد ﷺ پر ہیں۔
’حضرت محمد ﷺ پر لکھی کتابیں پڑھ کر کئی افراد نے اسلام کے پیغام کو سمجھنے کی کوشش کی۔‘
کیرن آرمسٹرانگ کو اسلام کی کئی خصوصیات نے متاثر کیا ہے۔ وہ کہتی ہیں کہ حضرت محمد کی شخصیت کے علاوہ دن میں 5مرتبہ نماز اور اپنے اللہ کے حضور سجدہ کرنا انہیں سب سے زیادہ اچھا لگتا ہے۔
’اسلام میں وہ کچھ ہے جو عیسائی مذہب میں بھی نہیں ہے۔‘
انہوں نے ایک واقعہ بیان کرتے ہوئے کہا کہ میں اسرائیل اور فلسطین کے معاملے پر کچھ نوجوانوں سے بات چیت کررہی تھی کہ اچانک ریڈیو پر قرآن کی تلاوت سنائی دی جس پر سارے نوجوان مسلمان خاموش ہو گئے اور سننے لگ گئے، مجھے اس بات نے بہت متاثر کیا۔
’جس کے بعد میں نے قرآن پڑھنا اور سمجھنا شروع کیا اور میری زندگی بدل گئی۔‘
اسلام اور عسائیت میں فرق بیان کرتے ہوئے کیرن نے بتایا کہ اسلام کے علاوہ کوئی بھی مذہب سارے معاشرے کی اصلاح کے بارے میں نہیں سوچتا، باقی تمام مذاہب صرف اور صرف خود تک محدود رہنے کی تلقین کرتے ہیں جبکہ اسلام پورے معاشرے کی اصلاح کی بات کرتا ہے۔
What was the Prophet Muhammad about? Karen Armstrong shares her perspective on Islam from her years of research with Al Jazeera's @MissSamJohnson
Watch #AJCentreStage with @imi_ ➡️ https://t.co/L3hubRgahg pic.twitter.com/LfmokqW62u
— Al Jazeera English (@AJEnglish) June 6, 2023
اسلاموفوبیا پر بات کرتے ہوئے کیرن نے کہا کہ جب اسلام اپنے عروج پر تھا اس وقت یورپ کا نام ونشان بھی نہیں تھا، رومن ایمپائر کے ختم ہونے کے بعد مغربی یورپ بنا۔
’یورپین اپنی تعلیمات سے ہٹ کر اسلاموفوبیا جیسا غلط نظریہ رکھتے ہیں، انہیں علم ہی نہیں کہ اسلام ایک مکمل اور جامع مذہب ہے۔‘
انہوں نے یہ بھی کہا کہ محمد ﷺ کے بعد ابن العربی کی تعلیمات نے بھی مجھے بہت متاثر کیا ہے، ان کی متعدد کتابوں کو پڑھا ہے جس سے اسلام کی کافی ساری چیزوں کا مطالعہ کرنے میں آسانی ہوئی۔
کیرن آرمسٹرانگ ایک مشہور مذہبی مورخ ، مشرق اور مغرب میں سب سے زیادہ پڑھی جانے والی مصنفہ ہیں۔ ان کی کتابوں کا 45 زبانوں میں ترجمہ ہو چکا ہے۔
آرمسٹرانگ کو عصر حاضر میں مذہب کے سب سے ذہین محافظوں میں سے ایک قرار دیا گیا ہے۔
