سپریم کورٹ نے آصف علی زرداری کے دست راست انور مجید کو اپنا نام ایگزٹ کنڑول لسٹ سے نکالنے کے لیے متعلقہ عدالت سے رجوع کر نے کی ہدایت کر دی۔ چیف جسٹس عمر عطا بندیال نے ریمارکس دیے کہ انور مجید اور دیگر لوگوں کے کام تو اب ٹھکا ٹھک ہو رہے ہیں، عدالت نے ہدایات کیساتھ کیس نمٹا دیا۔
انور مجید کا نام ای سی ایل سے نکالنے کی درخواست پر سماعت سپریم کورٹ میں ہوئی۔ وکیل منیر اے ملک نے مؤقف اپنایا کہ انور مجید کا 21 جون کو بیرون ملک میڈیکل چیک اپ ہے۔ عدالت نے انور مجید کو بینکنگ کورٹ سے رجوع کرنے کی ہدایت دیتے ہوئے کہا کہ نیب کے مطابق جعلی بنک اکائونٹس کیسز بینکنگ کورٹ کو منتقل ہو چکے ہیں، مناسب ہوگا کہ ای سی ایل سے نام نکالنے اور پاسپورٹ واپسی کے لیے متعلقہ عدالت سے رجوع کریں۔
وکیل نے سپریم کورٹ سے بینکنگ کورٹ کو جلد فیصلہ کرنے کی ہدایت دینے کی استدعا کی تو چیف جسٹس نے کہا کہ بینکنگ کورٹ سے رجوع تو کریں، نیب تو اب انور مجید اور دیگر کیساتھ بھرپور تعاون کر رہا ہے، عدالت نے ہدایات کیساتھ درخواست نمٹا دی۔
واضح رہے کہ جعلی اکاؤنٹس کیس میں چیئرمین اومنی گروپ انور مجید کا نام سپریم کورٹ نے ای سی ایل میں شامل کرنے کا حکم دیا تھا۔
