مسلم لیگ ن ( پی ایم ایل این) کے سینئر رہنما اور سابق وزیر اعظم شاہد خاقان عباسی نے اقتصادی رابطہ کمیٹی ( ای سی سی ) کی رکنیت سے استعفیٰ دے دیا ہے۔
ذرائع کے مطابق شاہد خاقان عباسی نے آذربائیجان سے مائع قدرتی گیس ( ایل این جی) خریدنے پر اپنے تحفظات کا اظہار کرتے ہوئے اقتصادی رابطہ کمیٹی سے اختلافات کیا اور اسی کو بنیاد بنا کر وہ کمیٹی کی رکنیت سے مستعفی ہو گئے ہیں۔
ذرائع نے بتایا ہے کہ شاہد خاقان عباسی نے سرکاری کمپنی پاکستان ایل این جی لمیٹڈ (پی ایل ایل) کے ذریعے آذربائیجان سے لیکوڈ نیچرل گیس (ایل این جی) خریدنے کی مخالفت کی ہے۔
ذرائع نے یہ بھی بتایا ہے کہ شاہد خاقان عباسی نے اپنے اعتراض میں مؤقف اختیار کیا کہ آذربائیجان سے ایل این جی کارگو پاکستان کی نجی کمپنی کے ذریعے خریدے جائیں اس پر پاکستان پیٹرولیم ڈویژن نے شاہد خاقان عباسی کے مؤقف کی مخالفت کی اور سمری تیار کرنے سے انکار کر دیا۔
واضح رہے کہ گزشتہ ہفتے وزیراعظم شہباز شریف نے آذربائیجان کا دورہ کیا اور وہاں حکومت کے ساتھ ایل این جی کی فراہمی سمیت مختلف شعبوں میں دو طرفہ تعاون بڑھانے پر اتفاق کیا تھا۔
وزیراعظم شہباز شریف سے ملاقات کے دوران آذر بائیجان کے صدر الہام علیوف نے کہا تھاکہ پاکستان کی توانائی کی ضروریات پوری کرنےمیں بھرپور تعاون کریں گے۔
