بلوچستان ہائیکورٹ میں خضدار کی تحصیل وڈھ میں کشیدہ صورتحال سے متعلق دائر درخواست کی سماعت مکمل کرتے ہوئے 21 جولائی تک ملتوی کر دی ہے۔ درخواست کی سماعت چیف جسٹس نعیم اختر افغان اور جسٹس عامر رانا پر مشتمل بینچ نے کی۔
جمعرات کو سماعت کے دوران درخواست گزار نے مؤقف اختیار کیا ہے کہ وڈھ میں دو گروپوں میں جاری تصادم کی وجہ سے شہریوں کی زندگی مفلوج ہوکر رہ گئی ہے۔
درخواست کی سماعت کرتے ہوئے چیف جسٹس بلوچستان ہائیکورٹ نے وڈھ کی صورتحال پر انتہائی افسوس کا اظہار کیا اور مقدمے کی اگلی سماعت کل جمعہ 21 جولائی تک ملتوی کر دی۔
مزید پڑھیں
دریں اثنا وزیر اعلیٰ بلوچستان میر عبدالقدوس بزنجو نے بھی وڈھ کی صورتحال پر تشویش کا اظہار کرتے ہوئے فریقین سے تحمل و برداشت کا مظاہرہ کرنے اور پرامن رہنے کی اپیل کی ہے۔
وزیر اعلیٰ نے کہا کہ علاقے کا امن برقرار رکھنا حکومت کے ساتھ ساتھ قبائلی و سیاسی عمائدین کی بھی ذمہ داری ہے۔ مسائل و تنازعات کو پرامن بات چیت کے ذریعہ حل کرنے میں حکومت اپنا کردار ادا کرنے کے لیے تیار ہے۔ کشیدگی اور جنگ کسی کے بھی مفاد میں نہیں مسائل کا بہترین حل بات چیت کے ذریعہ ہی ممکن ہے
وزیر اعلیٰ نے کمشنر کو ہدایت کی کہ انتظامیہ پولیس اور قانون نافذ کرنے والے ادارے علاقے میں امن کے قیام کو ہر صورت یقینی بنائیں۔ قبائلی، سیاسی و مذہبی عمائدین کے اثر و رسوخ کو بھی بروئے کار لایا جاۓ اور کسی کو بھی قانون ہاتھ میں لینے کی اجازت نہ دی جاۓ۔
