وزیر اعظم پاکستان میاں محمد شہباز شریف نے زراعت، لائیوسٹاک، معدنیات، کان کنی، ٹیکنالوجی، آئی ٹی اور توانائی کے شعبوں میں سرمایہ کاری کے لیے دوست ممالک کو راغب کرنے کے منصوبوں کی منظوری دے دی ہے۔
جمعہ کو حکومت پاکستان کی جانب سے ‘اقتصادی بحالی کے منصوبے’ کے افتتاح اور خصوصی سرمایہ کاری سہولت کونسل (ایس آئی ایف سی ) کے قیام کے سلسلے میں اپیکس کمیٹی کا اجلاس منعقد ہوا۔
اجلاس کی صدارت وزیر اعظم پاکستان نے کی، جس میں چیف آف آرمی سٹاف، وزرائے اعلیٰ، وفاقی وزرا اور دیگر اعلیٰ حکام نے شرکت کی۔
اپیکس کمیٹی نے خصوصی سرمایہ کاری سہولت کونسل ( ایس آئی ایف سی ) کے کام، سیمینارز اور منصوبوں کے افتتاح کے علاوہ سرمایہ کاروں تک رسائی سے متعلق تیار کی گئی حکمت عملی پر اطمینان کا اظہار کیا۔
اپیکس کمیٹی نے ’ایس آئی ایف سی ‘ کی حکمت عملی کے تحت سرمایہ کاروں کے ساتھ بات چیت کے لیے وزارتوں کی طرف سے پیش کیے گئے مختلف منصوبوں کا بھی جائزہ لیا۔
آخر میں نتیجہ خیز بحث اور اتفاق رائے کے بعد وزیر اعظم نے زراعت، لائیوسٹاک، معدنیات، کان کنی، آئی ٹی اور توانائی کے شعبوں میں دوست ممالک کے سرمایہ کاروں کو ملک میں سرمایہ کاری کی جانب راغب کرنے کے منصوبوں کی منظوری دی اور ان منصوبوں کو شروع کرنے اور ان کو عملی جامہ پہنانے میں دلچسپی رکھنے والے سرمایہ کاروں کو بلا کسی رکاوٹ سہولت فراہم کرنے کی بھی ہدایت کی۔
