پاکستان مسلم لیگ ن کی سینیئر نائب صدر مریم نواز نے پنجاب کے تمام 36 اضلاع میں خواتین یوتھ کوآرڈی نیٹرز کا تقرر کر دیا ہے۔ لیگی سینیئر نائب صدر نے نومنتخب کوآرڈی نیٹرز میں نوٹیفکیشن بھی تقسیم کر دیے۔
اس موقع پر اظہار خیال کرتے ہوئے مریم نواز نے کہا کہ خواتین کو قومی دھارے میں شامل کیے بغیر حقیقی قومی ترقی کا خواب شرمندہ تعبیر نہیں ہو سکتا۔
سینیئر نائب صدر مسلم لیگ ن نے کہا کہ مسلم لیگ ن ملک کی حقیقی جمہوری سیاسی جماعت ہے جس نے اختیارات کو نچلی سطح پر منتقل کرنے اور ہر شعبہ ہائے زندگی سے وابستہ افراد کو آگے بڑھنے کے مواقع فراہم کیے ہیں۔
انہوں نے کہا کہ مسلم لیگ ن نے اپنے قائد میاں نواز شریف کے ویژن پر عمل کرتے ہوئے خواتین کی قومی دھارے میں شمولیت کو یقینی بنایا ہے۔
ضلعی کوآرڈینیٹر خواتین نے کہا کہ سیاسی افق پر ن لیگ کی خواتین سیاسی رہنما آب و تاب سے چمک رہی ہیں۔ آج مسلم لیگ ن نے پنجاب کے تمام 36 اضلاع میں پارٹی کی کوآرڈی نیٹر مقرر کر کے سیاست میں خواتین کی اہمیت پر مہر ثبت کر دی ہے۔
خواتین کوارڈینیٹرز کا کہنا تھا کہ ضلعی سطح پرکوآرڈی نیٹر مقرر کرنے سے اضلاع میں خواتین کو فعال کرنے اور ان کے مسائل کو حل کرنے میں مددملے گی۔
تقریب کے اختتام پر مریم نواز نے 36 اضلاع سےمنتخب ہونے والی کوآرڈی نیٹرز میں تعیناتی کے نوٹیفیکیشن تقسیم کیے۔
