لاہور ہائیکورٹ نے سابق وزیر اعظم عمران خان کے بھانجے بیرسٹرحسان خان نیازی کو 18 اگست کو عدالت پیش کرنے کا حکم دیتے ہوئے پنجاب پولیس سمیت دیگر فریقین سے آئندہ سماعت پر رپورٹ طلب کرلی ہے۔
بیرسٹرحسان نیازی کے والد حفیظ اللہ نیازی نے بیٹے کی بازیابی کے لیے لاہور ہائیکورٹ سے رجوع کیا تھا۔ لاہور ہائیکورٹ کے جسٹس سلطان تنویر نے حفیظ اللہ نیازی کی درخواست پر تحریری حکم جاری کردیا ہے۔
لاہور ہائیکورٹ کے تحریری حکمنامے میں کہا گیا ہے کہ اگر حسان نیازی پولیس کی تحویل میں تو قانون کے مطابق متعلقہ عدالت میں پیش کیا جائے۔ آئی جی پولیس سمیت دیگر فریق آئندہ سماعت پر رپورٹ جمع کرائیں۔
تحریری حکم کے مطابق سرکاری وکیل کو عدالتی حکم پر عملدرآمد کو یقینی بنانے کی ہدایت کرتے ہوئے کہا ہے کہ اگر حسان نیازی فریقین کے تحویل میں ہے تو 18اگست کو عدالت پیش کریں۔
مزید پڑھیں
واضح رہے کہ گزشتہ ماہ انسداد دہشت گردی کی عدالت نے تاریخی جناح ہاؤس پر حملے سے متعلق ایک مقدمے میں عمران خان کی دو بہنوں اور بھانجے بیرسٹر حسن نیازی کو اشتہاری قرار دینے کی کارروائی شروع کی تھی۔
لاہور میں واقع کور کمانڈر ہاؤس، جسے جناح ہاؤس بھی کہا جاتا ہے، کو 9 مئی کو اسلام آباد ہائی کورٹ سے پارٹی سربراہ عمران خان کی گرفتاری کے بعد پاکستان تحریک انصاف کے حامیوں کے ایک ہجوم نے ہنگامہ آرائی کے بعد نذر آتش کر دیا تھا۔
9 مئی کو اسلام آباد ہائیکورٹ کے احاطہ سے سابق وزیر اعظم عمران خان کی گرفتاری کے بعد ملک بھر میں حکومت مخالف پر تشدد مظاہرے اور ساتھ ہی ہنگامے بھی ہوئے۔
ان ہنگاموں کے دوران راولپنڈی میں فوجی ہیڈ کوارٹر سمیت درجنوں فوجی تنصیبات اور سرکاری عمارتوں کو نقصان پہنچا یا گیا۔ پولیس اور دیگر سیکیورٹی اداروں کی سینکڑوں گاڑیوں کو بھی آگ لگا دی گئی تھی۔
