اقلیتوں کے حقوق پر عملدارآمد سے متعلق سکھوں کے 8 رکنی وفد نے اپنے چیئرمین سیموئل پیارا کی سربراہی میں کل بروز بدھ چیف جسٹس آف پاکستان، جسٹس عمر عطاء بندیال سے سپریم کورٹ میں ملاقات کی۔
چیف جسٹس نے وفد کو خوش آمدید کہتے ہوئے انہیں اقلیتوں کے قومی دن پر مبارکباد دی۔ چیف جسٹس نے اقلیتی وفد کو آئین پاکستان میں درج اقلیتوں کے حقوق کے بارے میں بتایا۔
انہوں نے کہا کہ پاکستان میں ہر کسی کو اپنے مذہب پر عمل کرنے کی مکمل آزادی ہے۔ چیف جسٹس نے کہا کہ پاکستان میں عدالتیں بنیادی انسانی حقوق کی ضامن ہیں اور عدالتوں نے ہمیشہ اقلیتوں کے حقوق کے بارے میں نوٹس لیتے ہوئے فیصلے دیے اور ان پر عملدرآمد کروایا ہے۔
پاکستان میں اقلیتوں خاص طور پر ہندو اور عیسائیوں کی مذہبی املاک کی حفاظت کے لیے بڑے اہم اقدامات کئے گئے ہیں۔
سکھ وفد نے چیف جسٹس کو سکھوں کی تاریخ اور ان کے مسائل کے بارے میں بتایا اور ان کی سیکیورٹی اور املاک کے تحفظ سے متعلق مسائل سے آگاہ کیا۔
چیف جسٹس نے کہا کہ اقلیتوں کے حقوق کی حفاظت ریاست کی بنیادی ذمے داری ہے اور انہوں نے یقین دہانی کروائی کہ وہ اقلیتوں کے مسائل کے بارے میں متعلقہ حکام سے بات کریں گے۔
وفد نے چیف جسٹس کو نقرئی کرپان تحفے میں پیش کی۔ وفد میں بابا مکھن سنگھ، بابا گرپال سنگھ، ڈاکٹر صاحب سنگھ، سردار بشن سنگھ، امریک سنگھ، کاکا سنگھ، ستنام سنگھ اور دھرم سنگھ شامل تھے۔
