نگراں وزیر اعلیٰ بلوچستان میر علی مردان خان ڈومکی نے کہا ہے کہ شفاف انتخابات کا انعقاد ہی نگراں حکومت کا اصل مینڈیٹ ہے۔ امن و امان کی بحالی اور سیکیورٹی چیلنجز سے نمٹنے کے لیے قانون نافذ کرنے والے اداروں کو مؤثر حکمت عملی اپنانا ہو گی۔
اتوار کو بلوچستان کے ضلع سبی میں نگران وزیراعلیٰ میر علی مردان خان ڈومکی کو سبی میں امن وامان کی صورتحال پر بریفنگ دی گئی۔ڈی جی آئی پی علی شیر جھکرانی نے نگران وزیر اعلیٰ کو بریفنگ دی۔
بریفنگ کےدوران نگراں وزیر اعلیٰ نے ہدایت کی کہ امن امان کی بحالی اور سیکیورٹی چیلنجز سے نمٹنے کے لیے قانون نافذ کرنے والے اداروں کو مؤثر حکومت عملی اپنانا ہوگی۔
انہوں نے کہا کہ پولیس کو روایتی حکمت عملی سے ہٹ کر جدت کے ساتھ سمارٹ حکمت عملی کی جانب بڑھنا ہو گا۔ پولیس کے کام میں جدید ٹیکنالوجی کا اپنانا اور اس کا درست استعمال کرنا ضروری ہے ۔
وزیر اعلیٰ کا کہنا تھا کہ تمام بڑے شہروں میں سیف سٹی کے نظریے کو اپناتے ہوئے عوام میں احساس تحفظ کو اجاگر کرنے کی ضرورت ہے۔ پرامن ماحول میں شفاف انتخابات کا انعقاد نگران حکومت کا مینڈیٹ اور اولین ترجیح ہے۔
انہوں نے پولیس کو ہدیات کی کہ وہ اپنی کارکردگی میں مزید بہتری لائے اور عوام کا اعتماد بھی حاصل کرے۔
