نگراں وزیر اعلی بلوچستان میرعلی مردان خان ڈومکی نے عندیہ دیا ہے کہ کوئٹہ کی طرز پر بلوچستان کے دیگر شہروں میں بھی گرین بس سروس شروع کی جائے گی۔
بدھ کے روز نگراں وزیراعلی بلوچستان میر علی مردان خان ڈومکی کوئٹہ میں گرین بس میں سفر کرتے ہوئے نظر آئے جس پر گرین بس کے مسافر خوشگوار حیرت میں مبتلا ہوئے۔
مسافروں نے میر علی مردان خان ڈومکی سے مطالبہ کیا کہ مزید روٹس پر بھی گرین بس سروس کا آغاز کیا جائے۔
نگراں وزیراعلی بلوچستان نے گرین بس کے مسافروں سے بات چیت کرتے ہوئے کہا کہ گرین بس سروس کا آغاز سابق صوبائی حکومت کا بہترین اقدام ہے، اس منصوبے کو صوبے کے دوسرے شہروں تک توسیع دی جائے گی۔
میرعلی مردان خان ڈومکی نے کہا کہ خوشگوار ماحول میں محفوظ سفر شہریوں کا حق ہے، خوشی ہے کہ ہماری مائیں بہنیں بیٹیاں اب گرین بس میں اطمینان کے ساتھ سفر کر سکتی ہیں، گرین بس سروس 7 بجے کی بجائے رات آٹھ بجے تک چلے گی۔
صوبائی نگراں وزیراعلی نے موقع پر اپنے ساتھ موجود سیکریٹری ٹرانسپورٹ کو فوری طور پر پلان پیش کرنے کی ہدایت کرتے ہوئے گرین بس سروس کے شام کے اوقات میں ایک گھنٹہ توسیع دینے کااعلان کیا۔
واضح رہے کہ کوئٹہ میں گرین بس سروس کا افتتاح رواں سال جولائی میں ہوا تھا، سابق وزیر ٹرانسپورٹ لک نعیم بازئی اور چیف سیکرٹری بلوچستان عبدالعزیز عقیلی نے گرین بس سروس کا افتتاع کیا تھا، ابتدائی طور پر اس بس سروس کا کرایہ 30 روپے رکھا گیا ہے۔
