حکومت نے معیشت کو مستحکم کرنے کے لیے 3 نئے شعبوں پر ٹیکس کے نفاذ کا پلان تیار کر لیا ہے، معاشی بحالی کے لیے بنائی گئی ٹاسک فورس ٹیکس وصولیوں کو بڑھانے کے لیے مختلف سفارشات وفاقی کابینہ کے سامنے رکھے گی، منظوری کے بعد ٹیکس وصولیوں میں اضافہ ہو گا اور ایف بی آر کا 92 کھرب روپے کا ٹیکس ہدف پورا ہو جائے گا۔
پرچون، زراعت اور رئیل اسٹیٹ پر ٹیکس لگانے کا منصوبہ ہے، مہتاب حیدر
وی نیوز کو سینیئر صحافی مہتاب حیدر نے بتایا کہ حکومت پرچون، زراعت اور ریئل اسٹیٹ سیکٹرز پر ٹیکس عائد کرنے اور منقولہ اثاثوں پر دولت ٹیکس لگانے کا منصوبہ بنارہی ہے، اس سلسلے میں حکومت نے معاشی بحالی کے لیے ایک ٹاسک فورس کا قیام کیا تھا جس کی سفارشات پر نئے شعبوں پر ٹیکس کا نفاذ کیا جائے گا۔ حکومت کا مشن ہے کہ آئندہ 2 سال میں ٹیکس ٹو جی ڈی پی کی شرح 15 فیصدپر لائی جائے۔
ایف بی آر ٹیکس کے نظام میں اصلاحات پر کام کر رہا ہے
مہتاب حیدر کے مطابق ایف بی آر کی جانب سے معیشت اور ٹیکس ادائیگی کے نظام کو ٹریک اینڈ ٹریس سسٹم میں لانے کے لیے ’ڈیجیٹائزیشن‘ پر کام کیا جا رہا ہے، اس ضمن میں تمباکو، چینی، کھاد اور سیمنٹ سیکٹرز کو منتخب کیا گیا ہے، ان سیکٹرز سے ضائع ہونے والے ٹیکس کو روکا جائے گا۔ ایف بی آر نے فیصلہ کیا ہے کہ پوائنٹ آف سیلز، سنگل ونڈو اور ڈیجیٹل انوائسنگ پوری طرح سختی سے نافذ کی جائیں گی۔
صحافی مہتاب حیدر کے مطابق ایف بی آر ان قوانین پر وسیع تر اتفاق رائے حاصل کر رہا ہے اور ان قوانین کو دستاویزی شکل دینے پر کام کر رہا ہے جس کے بعد ان قوانین کو آرڈیننس کے ذریعے نافذ کرایا جائے گا۔ ایف بی آر ٹیکس ریٹرن کے عمل کو سادہ بنانے کے منصوبے اور ود ہولڈنگ ٹیکس کے نظام میں اصلاحات پر بھی کام کر رہا ہے۔
جی ایس ٹی میں بہتری سے وصولیاں 30 کھرب تک جا سکتی ہیں
مہتاب حیدر کے مطابق ٹیکس کی جی ڈی پی کے لحاظ سے شرح 9.6 فیصد ہے جبکہ ایف بی آر کی ٹیکس ٹو ڈی جی پی ریشو 8.5 ہے اور گزشتہ مالی سال میں صرف 74 کھرب روپے کا ٹیکس جمع کیاجا سکا تھا، ایف بی آر نے آئندہ 2 سال کے لیے 130 کھرب کا ٹیکس ہدف تجویز کیا ہے، اس سے ٹیکس ٹو جی ڈی پی شرح 15 فیصد بنتی ہے۔
مہتاب حیدر نے وی نیوز کو بتایا کہ ایف بی آر کے مطابق جنرل سیلز ٹیکس کے نظام میں بہتری سے ٹیکس وصولیوں کو 30 کھرب روپے تک بڑھایا جا سکتا ہے، کسٹم ڈیوٹی و فیڈرل ایکسائز ڈیوٹی سے 8 کھرب روپے بنائے جاسکتے ہیں۔
