الیکشن کمیشن اور چیف الیکشن کمشنر کی توہین کرنے پر چیئرمین پی ٹی آئی عمران خان کیخلاف کیس کی سماعت نثار درانی کی سربراہی میں الیکشن کمیشن کے 4 رکنی بینچ نے کی، تاہم آج بھی سابق وزیر اعظم عمران خان اور دیگر کیخلاف فرد جرم عائد نہیں کی جاسکی۔
عمران خان کے وکیل شعیب شاہین نے کمیشن کے سامنے پیش ہو کر کہا کہ ان کے پچھلے جواب سے غلط فہمی پیدا ہوگئی ہے، چیئرمین پی ٹی آئی جیل میں ہیں، ان کے پروڈکشن آرڈر جاری کیے جائیں تاکہ وہ یہاں پیش ہوسکیں۔
کمیشن کے رکن نثار درانی نے دریافت کیا کہ آپ یہی چاہتے ہیں کہ ہم شوکاز نوٹس پر آرڈر جاری کریں، جس پر شعیب شاہین بولے؛ جی میں بالکل یہی چاہتا ہوں۔ نثار درانی نے کہا کہ شوکاز نوٹس کا جواب آپ جمع کرائیں ہم پروڈکشن آرڈر جاری کردیتے ہیں
کمیشن کے بلوچستان سے رکن شاہ محمد جتوئی نے کہا کہ ہم چارج فریم کردیں گے، اپنے دفاع میں جو پیش کرنا ہے وہ آپ کی مرضی ہے۔ نثار درانی نے کہا کہ چیئرمین پی ٹی آئی کونسی جیل میں ہیں، ہم سیکیورٹی کے لیے آئی جی پولیس کو لکھ دیتے ہیں۔
شعیب شاہین کا کہنا تھا کہ سیکیورٹی کے بہانے دوسری عدالتوں میں چیئرمین پی ٹی آئی کو پیش نہیں کیا جارہا ، جس پر نثار درانی نے کہا کہ چیئرمین پی ٹی آئی تو پہلے یہاں پر آتے نہیں تھے اب پروڈکشن آرڈر کا کہہ رہے ہیں، جس پر شعیب شاہین بولے؛ آپ پہلے پروڈکشن آرڈر جاری تو کریں تاکہ وہ پیش ہوسکیں۔
سابق وزیر اعظم عمران خان کے وکیل شعیب شاہین کمیشن کو مخاطب کرتے ہوئے کمیشن کے ایک اور رکن اکرام اللہ نے کہا کہ آپ یہ تو نہیں چاہتے کہ ہم ان کے پاس چلے جائیں۔ الیکشن کمیشن نے فرد جرم عائد کرنے کی غرض سے عمران خان کے پروڈکشن آرڈر جاری کرنے کی استدعا منظور کرتے ہوئے سماعت 24 اکتوبر تک ملتوی کردی ہے۔
