لیجنڈری فاسٹ بولر شعیب اختر نے اپنے یوٹیوب چینل پر جمعہ کو بنگلورو میں آسٹریلیا کے خلاف ورلڈ کپ میچ میں پاکستان کی شکست کے بعد اپنی مایوسی کا اظہار کیا ہے۔
شعیب اختر نے کا کہنا تھا کہ میں آپ سے یہ سوال کرتا ہوں کہ آپ نے فیلڈنگ کا فیصلہ کیوں کیا؟ آپ پہلے کھیل کر ہدف دیتے، شاہین آپ کو شام میں وکٹ نکال کر دیتے لیکن ٹاس کے موقع پر ہی غلط فیصلہ لیا گیا۔
شعیب اختر نے مزید کہا کہ وہ ٹیم میں جیت کی تڑپ کی کمی سے مکمل طور پر مایوس ہیں۔ کپتان بابر اعظم ایک بار پھر بڑی اننگز کھیلنے میں ناکام رہے جس پر ہر طرف سے تنقید کی جا رہی ہے۔ اچھی شروعات کرنے کے بعد وہ 14 گیندوں میں صرف 18 رنز بنا سکے۔
ان کا مزید کہنا تھا کہ بابر اعظم کو اپنے لیے “بڑے کھلاڑی” کے ٹیگ کو درست ثابت کرنے کے لیے بڑی ٹیموں کے خلاف اسکور کرنے کی ضرورت ہے۔
میچ کے دوران بابر اعظم کی کپتانی پر تنقید کرتے ہوئے کہا کہ پاکستانی ٹیم کی کارکردگی میری سمجھ سے باہر ہے ہمارا کپتان بزدل ہے وہ کچھ بھی الگ کرنے کی کوشش نہیں کرتا، مجھے نہیں لگتا کہ پاکستان کرکٹ ٹیم سیمی فائنل تک رسائی حاصل کر پائے گی۔
ان کا مزید کہنا تھا کہ ابھی بڑی ٹیموں سے میچ ہے، اور پاکستان کیا کرتی ہے دیکھنا باقی ہے، لیکن شاہین نے بہت اچھی بولنگ کی، لیکن میں ایک سوال کرتا ہوں کہ کیا پاکستانی ٹیم سیمی فائنل کھیلنے کی حقدار ہے یا نہیں۔
