یہ تب تک تھا کہ جب تک میں اس سے نہیں ملا تھا۔ تب میرا اور اس کا ربط ۔۔۔ اور وجہِ ربط ۔۔۔ لفظ کا تھا۔ وہ شاعر تھا اور میں اس کی شاعرگی کا مداح۔ لیکن اس تب کے بعد کہ جب میں اس سے مل چکا تو اس کا شاعر پنا کہیں غائب ہوگیا تھا۔ اور جب اس سے مل کر میں الگ ہوا تھا۔۔۔ ایک طویل معانقہ۔۔۔ ایک لمحے میں اپنے فطری انجام کو پہنچا تھا۔۔۔ اور اس نے ایک ہاتھ میں میرا ایک ہاتھ لیے ہوئے۔۔۔ دوسرے ہاتھ سے میرے گال کو شفقت سے تھپتھپایا تھا۔۔۔ اور گھمن نے گاڑی کے انجن کو سلگایا تھا۔۔۔ اور میں گاڑی میں آ بیٹھا تھا۔۔۔ تو اس وقت مجھے احساس ہوا کہ میں ایک شاعر سے نہیں ملا تھا۔۔۔ میری ملاقات تو محبت سے ہوئی تھی۔۔۔ اداسی سے ہوئی تھی۔۔۔ معصومیت سے ہوئی تھی۔۔۔ سچائی سے ہوئی تھی۔۔۔ حساسیت سے ہوئی تھی۔۔۔ نرمگی سے ہوئی تھی۔۔۔ کوملتا سے ہوئی تھی۔۔۔ کسک سے ہوئی تھی۔۔۔ امید سے ہوئی تھی۔۔۔ خواب سے ہوئی تھی۔۔۔ تعبیر سے ہوئی تھی۔۔۔ ایک ترتیب لگے شور سے ہوئی تھی۔۔۔ ایک بے ترتیب سی خاموشی سے ہوئی تھی۔ وہ شور۔۔۔ جو اس ملاقات کے بعد میرے اندر خاموش تھا۔۔۔ اور وہ خاموشی۔۔۔ جو میری رگوں میں گونج رہی تھی۔۔۔ گاڑی چل رہی تھی۔۔۔ اور گاڑی کے اندر مہدی حسن کی گہری آواز رچی تھی۔۔۔ اور میرے ارد گرد سڑک پر گاڑیاں تھیں۔۔۔ لوگ تھے۔۔۔ لیکن سب جیسے میوٹ پر لگا تھا۔۔۔ اور سلوموشن میں چل رہا تھا۔۔۔ اور میرے اندر اس شاعر سے ملنا ہُمک رہا تھا۔
بھی کچھ ہی دیر پہلے اس سے الوداعی گلے لگے لگے۔۔۔ میں نے۔۔۔ جھجکتے جھجکتے۔۔۔ اس کے دائیں رخسار۔۔۔ اور اس کی گردن۔۔۔ اور اس کے کان کے قریب بوسہ لیا تھا۔۔۔ تو میرے ذہن میں۔۔۔ کچھ ہی دیر پہلے۔۔۔ اسی کا سنایا اداسی کا ایک نامہ تھا۔۔۔
اکمل گھمن کو اگر ایک سطر میں بیان کرنا ہو تو کہا جا سکتا ہے کہ اس کے پاس لفظ’ نہیں’ نہیں ہے۔ کوئی کام۔۔۔ کوئی خواہش ہو۔۔۔ جس کا اظہار اس کے سامنے انسان بے خیالی میں بھی کر دے تو جھٹ کہے گا۔۔۔ ’ابھی کر لیتے ہیں۔۔۔‘ اور اب کی بار بھی یہی ہوا۔۔۔ لیکن اس بار خواہش کا اظہار بے خیالی میں نہیں ہوا تھا۔۔۔
میں اس شہر آیا ہوا تھا اور ہڑک دو لوگوں سے ملنے کی تھی۔۔۔ ایک وہ کہ جس کو سوچ۔۔۔ ذہن میں خیال جاگتا تھا۔۔۔ اور دوسرا وہ کہ جومیرے کہے بغیر۔۔۔ مجھ سے ملے بغیر۔۔۔ میرے اس خیال کو پکڑ کر۔۔۔ اس پر منتر پھونک کر۔۔۔ اسے اظہار میں بدل دیتا تھا۔۔۔ اور اس بار جب گلگت سے نکلا تو ان دونوں سے ملنے کی خواہش بے حد تھی۔۔۔ یہی دونوں۔۔۔ ایک وہ کہ جس کو سوچتے۔۔۔ میرے اندر خیال جاگتا تھا۔۔۔ اور دُوجا وہ ۔۔۔ کہ جو اس خیال کو اظہار دیتا تھا۔۔۔ مجھے ملے بغیر۔۔۔ میرے کہے بغیر۔۔۔ قدیم ہندستان کے انتریامیوں کی طرح۔۔۔
اور اس بار۔۔۔ پتا نہیں ملنے کی آس میں شدت کیسی تھی کہ سب کچھ جیسے خود بہ خود ہوتا چلا گیا ۔۔۔ جیسے خود بہ خود موسم بدل جاتے ہیں ۔۔۔ جیسے خود بہ خود رات میں سے دن نکل آتا ہے ۔۔۔ جیسے خود بہ خود پیڑ ہرے ہو جاتے ہیں ۔۔۔ جیسے خود بہ خود ۔۔۔ محبت ہو جاتی ہے ۔۔۔
اس نیم شبی ۔۔۔ نیم شامگی میں گھمن سے کہا ۔۔۔ ’شاعر سے ملنا ہے ۔۔۔‘
بولا ۔۔۔ ’ہنے ای گل کر لینے آں ۔۔۔ (ابھی بات کر لیتے ہیں ۔۔۔)‘
کہا تھا ناں کہ گھمن کے پاس ۔۔۔ ’نہیں‘ نہیں ہے ۔۔۔
اس نے نمبر ملایا ۔۔۔ اور میرا بتایا ۔۔۔ اور ملنے کا کہا ۔۔۔ دوسری طرف سے اِذن مل گیا ۔۔۔
اگلے روز ۔۔۔ دوپہر کے قریب ہم شاعر کے ہاں جا پہنچے ۔۔۔ اِدھر گھمن نے گاڑی پارک کی ۔۔۔ اُدھر شاعر بھی ۔۔۔ نیم فالسئی رنگی ۔۔۔ ادھ بازو ٹی شرٹ اور نیم بھوری پینٹ میں ملبوس اپنی گاڑی سے اترا ۔۔۔ اور نہایت گرم جوشی سے ہمارا استقبال کرنے لگا ۔۔۔ اور میرا ہاتھ ۔۔۔ محبت ۔۔۔ شفقت ۔۔۔ اور اپنائیت سے تھام ۔۔۔ اندر لے گیا ۔۔۔ مہمان خانے کا ڈے کَور ۔۔۔ شاعر کے نفیس ذوق کا آئینہ دار تھا ۔۔۔ کچھ دیر زمینی منزل پر بیٹھنے کے بعد ۔۔۔ ہمیں اوپر در اوپر لے جایا گیا ۔۔۔ سب سے اوپری منزل پر شاعر کی آماج گاہ تھی ۔۔۔ وہ جگہ ۔۔۔ جہاں بیٹھ کر شاعر ۔۔۔ مجھ سے ملے بغیر ۔۔۔میرا ذہن پڑھتا تھا ۔۔۔ میرے دل کی کیفیات کو ماپتا تھا ۔۔۔
میری اداسیاں ۔۔۔ میری خوشیاں ۔۔۔ میرے قہقہے ۔۔۔ میرے بہے ۔۔۔ ان بہے ۔۔۔ ادھ بہے آنسوؤں کو گنتا تھا ۔۔۔
ان میں پانی اور نمک اور جذبات کے تناسب کی جانچ کرتا تھا ۔۔۔
کھرے اور کھوٹے کو الگ کرتا تھا ۔۔۔
اور پھر اس سب کو۔۔۔ اپنے اندر کی کٹھالیوں میں ڈال کر ۔۔۔ خود چکھتا تھا ۔۔۔
ان کی ماہیت ۔۔۔ کثافت ۔۔۔ لطافت ۔۔۔ سب کو ۔۔۔ اپنے وجدان ۔۔۔ گیان ۔۔۔ اور بیان کی چھاننیوں سے گزار کر ۔۔۔ میرے دل کی ’محسوسگی‘ کو ۔۔۔ اپنی کہی میں ڈھال کر ۔۔۔ پوسٹ کر دیتا تھا ۔۔۔ اور میں ۔۔۔ ایک ہزار کلو میٹر دور جب اس کی کہی کو پڑھتا تھا تو دم بہ خود رہ جاتا تھا ۔۔۔
مطلب کیا۔۔۔!
ٹیلی پیتھی ۔۔۔ ؟
کوئی تنوینی علم ۔۔۔ ؟
کوئی جادو ۔۔۔؟
مطلب کیا ۔۔۔!
سیڑھیوں کے رستے میں ۔۔۔ راہ داریوں کی دِواروں میں ۔۔۔ کمرہ در کمرہ کھلنے والی بھول بھلیوں میں ۔۔۔ ہر جگہ ۔۔۔ کتابیں الماریوں میں سجی کھڑی تھیں ۔۔۔ ہاتھوں میں گویا گیندے کے ہار لیے ۔۔۔ موگرے کے پھول لیے ۔۔۔ گلاب کی پتیاں لیے ۔۔۔ اور چہروں پر ۔۔۔ خوش آمدیدگی کے جذبات لیے۔۔۔
میں نے ایک بار ۔۔۔ اے حمید کے بارے میں لکھا تھا کہ اس کا شوق ۔۔۔ لمس سے بندھا تھا ۔۔۔ اور ذوق ذائقے سے ۔۔۔
اس شاعر کا شوق ۔۔۔ محبت میں گندھا تھا ۔۔۔ اور ذوق ۔۔۔ مہمان نوازی میں۔۔۔
لمس نرم ۔۔۔ اور لہجہ نرم ترین تھا ۔۔۔ مہمانوں کی آمد کی خوشی اس کے چہرے سے ہویدا تھی ۔۔۔ اور جذبات چھپائے نہیں چھپ رہے تھے ۔۔۔ اس کا بس نہیں چل رہا تھا کہ ہمیں پلکوں پر بٹھالے۔۔۔
شاعر کی گفت گو ۔۔۔ تردد سے ماورا تھی ۔۔۔
محبت ۔۔۔تصنع سے پاک تھی ۔۔۔
گرم جوشی ۔۔۔ بناوٹ سے تہی تھی ۔۔۔
وضع داری ۔۔۔ بے زاری سے محروم تھی ۔۔۔
اور دانش ۔۔۔شعوری کوشش سے پرے تھی ۔۔۔
باتیں کرتے ۔۔۔ کبھی اس کی آنکھوں کے کنارے مسکرانے لگتے ۔۔۔ کبھی اداس ہو جاتے ۔۔۔ تو کبھی نم ۔۔۔ وہ ایک کھلی کتاب کی طرح ۔۔۔ اپنے جذبات اور احساسات اور خیالات کا ابلاغ کرتا رہا ۔۔۔اپنے تجربات کہتا رہا ۔۔۔ آسانی و سہولت کے ساتھ ۔۔۔ اور میں ۔۔۔ اس کے سامنے بیٹھا ۔۔۔ اسے دیکھنے سے ذیادہ سنتا رہا ۔۔۔سننے سے ذیادہ دیکھتا رہا ۔۔۔
اور پھر جب ہم ایک ریستوراں میں ساتھ ساتھ بیٹھے تھے ۔۔۔ اور وہ ہماری میزبانی میں کوئی کسر نہ اٹھائے دے رہا تھا ۔۔۔ تب اس نے ۔۔۔ اپنے اس دکھ کا اظہار کیا تھا ۔۔۔ دکھ نہ بھی کہیں ۔۔۔ ایک کسک کا اظہار کیا تھا ۔۔۔ وہ کسک کہ جو سرحد پار کے ایک مہمان کے ساتھ منسلک تھی ۔۔۔ جو سالوں بعد اپنی جنم بھومی کی یاترا کو آیا تھا ۔۔۔ میرے شاعر کا مداح تھا ۔۔۔ اس کی نظمیں پڑھتا تھا ۔۔۔
میرا میزبان ۔۔۔ سرحد پار سے آئے اس شاعر بارے بات کر رہا تھا ۔۔۔ اور اس کی آنکھیں دور کسی منظر میں جھانک رہی تھیں ۔۔۔ جن کی سطح پر ۔۔۔ پانی کی ایک لطیف سی تہہ نظر آرہی تھی ۔۔۔
کہنے لگا ۔۔۔’ وہ مہمان شاعر جب آیا تھا۔۔۔ تو اس نے مجھے گلے سے لگایا تھا ۔۔۔ اور میں نے اسے ۔۔۔ اور اس نے میرے گال کو اپنے گال سے مَس کیا تھا ۔۔۔ محبت اور خلوص اور پیار اور شفقت کے ساتھ ۔۔۔ اس کے جانے کے بعد ۔۔۔ میں اب سوچتا ہوں ۔۔۔ کاش ۔۔۔میں بھی اس کے گال کو ہاتھ لگا، چھو لیتا ۔۔۔‘
اور یہ کہتے ہوئے ۔۔۔ شاعر کی آواز میں ارتعاش تھا ۔۔۔ اور آنکھوں میں نمی تھی ۔۔۔ اور پھر کچھ دیر بعد میں اس شاعر سے ۔۔۔ شاعرِ وقت سے ۔۔۔ نصیر احمد ناصر سے جدا ہو رہا تھا ۔۔۔ اور میری آنکھیں بھی نم تھیں ۔۔۔ اور اس ملاقات سے پہلے تک ۔۔۔ وہ میرے لیے ۔۔۔ میری ہی کیفیات کا بیان گو شاعر تھا ۔۔۔ لیکن اس تب کے بعد کہ جب میں اس سے مل چکا ۔۔۔ تو اس کا شاعر پنا کہیں پس منظر میں چلا گیا تھا ۔۔۔ اور میرے سامنے ایک انسان تھا ۔۔۔ انسانیت سے لبریز ۔۔۔ انسانی جذبات سے بھرا ہوا ۔۔۔ ایک محبت کرنے والا ۔۔۔ ایک با اخلاق ۔۔۔ ایک مہمان نواز ۔۔۔ ایک ملنسار ۔۔۔ ایک منکسرالمزاج انسان ۔۔۔ بہت کم ادیب و شاعر ایسے ملے کہ جن سے ملنے کے بعد ۔۔ ان سے ملنے سے پہلے کا رُمان و عقیدت قائم رہتا ہے ۔۔۔ اسی لیے میں ۔۔۔ ادیب و شاعر کے کام کو ۔۔۔ اس کی شخصیت سے الگ رکھتا ہوں ۔۔۔ لیکن نصیر احمد ناصر سے ملاقات کے بعد ۔۔۔ اس کی شخصیت اور کام میں ۔۔۔ کوشش کے باوجود کوئی بُعد نہ دیکھا ۔۔۔دونوں کو ایک سے بڑھ کر ایک پایا ۔۔۔
اور جب اس کے وجود سے میرا وجود الگ ہوا تھا ۔۔۔ ایک طویل معانقہ ۔۔۔ ایک لمحے میں اپنے فطری انجام کو پہنچا تھا ۔۔۔ اور اس نے ایک ہاتھ میں میرا ایک ہاتھ لیے ہوئے ۔۔۔ دوسرے ہاتھ سے میرے گال کو شفقت سے تھپتھپایا تھا ۔۔۔ تب میرے ذہن میں نصیر احمد ناصر کی وہ کسک جھلملا رہی تھی ۔۔۔ سمندر پار سے آئے ایک شاعر کے حوالے سے ۔۔۔ اور میں نے ۔۔۔ محبت و عقیدت سے ۔۔۔ اس کے دائیں گال ۔۔۔ اور گردن کے بیچ کہیں ۔۔۔ اس کا بوسہ لے لیا تھا ۔۔۔تاکہ ویسی کسک ۔۔۔ میرے ساتھ نہ رہے ۔۔۔
اور میرے دل میں ۔۔۔ اِسی شہر میں ۔۔۔ دو دن بعد ملنے والے ۔۔۔ اسی شخص کا تصور تھا ۔۔۔ جس کے بارے میں ۔۔۔ سوچ میں ابھرنے والے خیال کو ۔۔۔ نصیر احمد ناصر نظم کرتا ہے ۔۔۔ مجھے اور اسے جانے بغیر ۔۔۔ مجھ سے اور اس سے ملے بغیر ۔۔۔ قدیم ہندستان کے انتریامیوں کی طرح ۔۔۔۔
اور میرے وجود میں ۔۔۔ نصیر احمد ناصر کی ایک نظم دوڑ رہی تھی ۔۔۔
محبت ۔۔۔ دروازے پر کھڑی ہو ۔۔۔
تو اسے ۔۔۔ انتظار مت کراؤ ۔۔۔
کیا معلوم ۔۔۔ وہ ۔۔۔ کتنی دور سے چل کر آئی ہو ۔۔۔
ذرا سی تاخیر ۔۔۔ یا تذبذب سے ۔۔۔
وہ ۔۔۔ انجان راستوں کی طرف جا سکتی ہے ۔۔۔
کبھی واپس نہ آنے کے لیے ۔۔۔
پھر ۔۔ دل کا دروازہ ۔۔۔ عمر بھر کھلا بھی رہے ۔۔۔
تو کیا ۔۔۔!
خالی دروازوں سے ۔۔۔ بس ۔۔۔ ہوا گزرتی ہے ۔۔۔۔
