آسٹریلیا کے وزیراعظم اینتھونی البانیز نے کہا ہے کہ پاکستان دنیائے کرکٹ میں ایک قابل فخر قوم ہے، ہم ایک باصلاحیت پاکستانی اسکواڈ سے نبردآزما ہونے کے لیے بہت پرجوش ہیں۔ ان کا کہنا تھا کہ وسیم اکرم اور وقار یونس کی فاسٹ بؤلنگ کا بہت بڑا مداح رہا ہوں۔
کرکٹ آسٹریلیا نے پاکستان بمقابلہ پرائم منسٹر الیون کی تاریخوں کا اعلان بھی کردیا ہے۔ دونوں ٹیموں کے مابین 4 روزہ میچ 6 سے 9 دسمبر تک کینبرا میں کھیلا جائے گا۔ میچ کے ابتدائی روز آسٹریلیا کے وزیراعظم اینتھونی البانیز، مانوکا اوول اسٹیڈیم میں موجود ہوں گے۔
دورہ آسٹریلیا: پاکستان ٹیسٹ اسکواڈ کا کیمپ آئندہ ہفتے لگانے کا فیصلہ
پاکستان کرکٹ بورڈ (پی سی بی ) کے اعلیٰ حکام دورہ آسٹریلیا کے لیے قومی ٹیم میں زیادہ تبدیلیوں کے حق میں نہیں ہیں۔ پاکستان نے آسٹریلیا کے خلاف 3 ٹیسٹ میچوں کی سیریز کھیلنی ہے۔ 14 دسمبر کو پہلے ٹیسٹ سے قبل ٹور میچ بھی کھیلا جائے گا، ٹور میچ 6 دسمبر سے کینبرا میں کھیلا جائےگا۔
ذرائع کے مطابق آسٹریلیا کے خلاف سیریز کی تیاریوں کے لیے قومی ٹیم کا کیمپ آئندہ ہفتے راولپنڈی کرکٹ اسٹیڈیم میں لگانے کی تجویز سامنے آئی ہے۔ قومی ٹیسٹ اسکواڈ کے ارکان 20 نومبر کو رپورٹ اور 21 نومبر سے ٹریننگ کا آغاز کریں گے۔ پاکستان ٹیسٹ اسکواڈ 2 دسمبر کو آسٹریلیا کے لیے روانہ ہوگا۔
