نگراں وزیر اطلاعات بلوچستان جان اچکزئی نے کہا ہے کہ صوبے سے غیر قانونی تارکین وطن میں سے 1 لاکھ افراد واپس جا چکے ہیں جبکہ 1500 غیر ملکی افراد حراست میں ہیں، بعض افغان حکام صورتحال کو خراب کر رہے ہیں، افغانستان پاکستان میں دہشت گردی کی کارروائیوں کرنے والوں کو اپنی سرزمین استعمال نہ کرنے دے، افغان حکام اپنے شہریوں کو بسانے کا بندوبست کریں۔
کوئٹہ پریس کلب میں نیوز کانفرس کرتے ہوئے نگراں وزیر اطلاعات جان اچکزئی نے کہا کہ غیر قانونی طور پر مقیم تمام قومیتوں اور تمام ملکوں کے افراد واپس جا رہے ہیں، وفاق اور صوبائی حکومت غیر قانونی تارکین وطن کی واپسی کے لیے اپنے تمام وسائل کو بروئے کار لا رہی ہیں۔
جان اچکزئی نے کہا کہ صورتحال میں پاکستان سے تعاون کرنے کے بجائے بعض افغان حکام صورتحال کو خراب کرنے کی کوشش کررہے ہیں، پاکستان کو دھمکیوں سے کام نہیں چلے گا، افغان حکام اپنی ذمہ داریاں پوری کریں اور اپنے شہریوں کو بسانے کا بندوبست کریں۔
صوبائی وزیر داخلہ نے کہا کہ پاکستان کی طرف میلی آنکھ سے دیکھنے والوں کو منہ توڑ جواب دیا جائے گا، ہمارا اب بھی یہی مطالبہ ہے کہ افغانستان پاکستان میں دہشت گردی کی کارروائیاں کرنے والوں کو اپنی سرزمین استعمال نہ کرنے دے۔
انہوں نے کہا کہ افغان حکومت دہشتگردی کی کارروائیوں میں ملوث ٹی ٹی پی کے ذمہ داروں کو پاکستان کے حوالے کرے، افغانستان نے ان دہشتگردوں کی پشت پناہی جاری رکھی تو پاکستان دہشتگردوں سے نمٹنا جانتا ہے۔
