ایف آئی اے میں ملازمت کی خاطر دوست کی جگہ امیدوار بن کر ٹیسٹ دینے والے مجرم کو 3 سال قید کی سزا سنادی گئی۔
جوڈیشل مجسٹریٹ اسلام آباد کی عدالت میں پیش کیے گئے چالان کے مطابق ملزم عطاء اللہ اپنے دوست زرداد کی جگہ کانسٹیبل کی پوسٹ کے لیے تحریری امتحان دینے کے لئے امتحانی مرکز میں پیش ہوا۔
امتحان کی نگرانی کے دوران ایف آئی اے کی سب انسپکٹر صفیہ شامیر نے ملزم کی نشاندہی کرتے ہوئے ملزم کو مزید کارروائی کے لیے ایف آئی اے اینٹی کرپشن سرکل اسلام آباد کے حوالے کیا۔
سب انسپیکٹر سلطان احمد نے مقدمے کی تحقیقات مکمل کرتے ہوئے مورخہ گذشتہ برس مارچ میں متعلقہ عدالت میں چالان جمع کرایا۔
مقدمے کی سماعت مکمل ہونے پر جوڈیشل مجسٹریٹ اسلام آباد نے عطاء اللہ کو مجرم قرار دیتے ہوئے 3 سال قید کی سزا سنائی۔
ایف آئی اے کی جانب سےاسسٹنٹ ڈائریکٹر سید جواد علی شاہ نے مقدمے کی پیروی کی۔
