پاکستان ڈرامہ انڈسٹری کی معروف اداکارہ اقراء عزیز نے حال ہی میں ٹی وی اسکرین پر کم بیک کیا ہے جہاں وہ نجی ٹی وی جیو کے ڈرامہ سیریل منت مراد میں جلوہ گر ہیں۔ جہاں یہ ڈارمہ اپنے کنٹنٹ کی وجہ سے مشہور ہے وہی یہ ڈرامہ سیریل اس وقت موضوع بحث بنا جب ایک قسط کے دوران اقرا عزیز کو دلہن کے جوڑے میں دیکھا گیا اور ایک تنازع کھڑا ہوگیا۔
ہوا کچھ یوں کہ ‘منت’ اور ‘مراد کی شادی کا سین 14 نومبر 2023 کو ٹیلی ویژن پر نشر کیا گیا تھا جس میں مرکزی کرداروں کی آن اسکرین شادی پاکستانی اداکارہ صبور علی اور ان کے اداکار شوہر علی انصاری کی حقیقی زندگی کی شادی کی تقریبات سے حیرت انگیز مماثلت رکھتی تھی۔
اقراء عزیز نے ڈرامے میں شادی کے سین کے لیے جو لباس پہنا تھا اس سے لے کر پنڈال کی سجاوٹ تک، صبور علی کی اصل زندگی میں ہونے والی شادی سے بہت سی غیر معمولی مماثلتیں تھیں۔
اقراء عزیز نے ڈیزائنر فائزہ ثقلین کا وہی عروسی لباس پہنا تھا جو صبور علی نے اپنی شادی پر پہنا جبکہ ناظرین کا یہ بھی کہنا ہے کہ جس جگہ اس ڈرامے کی شوٹنگ کی گئی وہ بھی ایسا لگتا ہے کہ صبور کا ویڈنگ وینیو ہی ہے۔
سماجی رابطے کی ویب سائٹ پر جب اس حوالے سے بحث طویل ہوئی تو صبور علی نے اپنے انسٹاگرام اکاونٹ پر سٹوری شیئر کرتے ہوئے اپنے غصے کا اظہار کیا۔ صبور علی نے لکھا اور میں اس کے بارے میں کیسا محسوس کروں؟ میری زندگی کا سب سے بڑا لمحہ، میریں یادیں ،جذبات، اور سب سے اہم بات میری شادی کے لیے میرا سارا لک ۔ متاثر ہونے میں اور نقل کرنے میں فرق ہوتا ہے، میری شادی کی ہر ایک چیز کی نقل کی گئی ہے۔
واضح رہے کہ اس حوالے سے ڈریس ڈیزائنر فائزہ ثقلین کا کہنا تھا کہ یہ غیر ضروری ہے۔ انہوں نے اپنی انسٹاگرام سٹوری میں لکھا مجھے لگتا ہے کہ اس ہنگامہ آرائی کی کوئی ضرورت نہیں تھی، ہمارے پاس اسے فروخت کرنے اور/یا مزید تعاون کے لیے دینے کے تمام حقوق ہیں۔
