غیرمعمولی مون سون بارشوں کی وجہ سے آنے والے سیلاب سے متاثرہ کمیونٹیز کی اہم ضروریات کے پیش نظر شاہ سلمان ہیومینٹیرین ایڈ اینڈ ریلیف سینٹر نے پاکستان کے سرد ترین علاقوں کے لوگوں کو موسم سرما میں ریلیف فراہم کرنے کے لیے ایک اہم قدم اٹھایا ہے جو منفی اثرات کا شکار ہیں۔
شاہ سلمان ریلیف سینٹر کی جانب سے پاکستان میں اپنی امدادی سرگرمیوں کو نمایاں طور پر تیز کر دیا گیا ہے، اقوام متحدہ کی ایجنسیوں، این ڈی ایم اے اور پی ڈی ایم اے کے تعاون سے خیبر پختونخوا اور بلوچستان میں 19 ہزار سرمائی ریلیف پیکجز تقسیم کیے جا چکے ہیں۔ اس کا مقصد سیلاب سے متاثرہ افراد کی تکالیف کو کم کرنا اور مستحق افراد کی اشد ضرورت میں مدد فراہم کرنا ہے۔
خیبرپختونخوا کے 5 اضلاع (اپر چترال، لوئر چترال، اپر دیر، اپر سوات، اور اپر کوہستان) میں 11 ہزار سرمائی امدادی پیکیج تقسیم کیے گئے۔
مزید برآں بلوچستان کے 4 اضلاع قلات، سہراب، قلعہ سیف اللہ اور زیارت میں 8 ہزار ریلیف پیکجز تقسیم کیے گئے۔
ان پیکجوں میں 2 پولیسٹر لحاف اور مردوں اور عورتوں دونوں کے لیے گرم شالوں کی ایک کٹ کے ساتھ ساتھ بچوں اور بڑوں کے لیے گرم ملبوسات شامل ہیں۔
