حوالہ ہنڈی اورغیر قانونی کرنسی ایکسچینج میں ملوث عناصر کے خلاف رواں برس کریک ڈاؤن کے دوران ایف آئی اے کراچی زون نے مجموعی طور پر 39 کروڑ روپے سے زائد مالیت کی ملکی و غیر ملکی کرنسی برآمد کرتے ہوئے 77 ملزمان کو گرفتار کیا ہے۔
ڈائریکٹر ایف آئی اے کراچی زون ضعیم اقبال شیخ کی ہدایت پر غیر قانونی کرنسی ایکسچینج میں ملوث عناصر کے خلاف جاری کریک ڈاؤن میں رواں سال کے دوران حوالہ ہنڈی اور کرنسی کی غیر قانونی ایکسچینج کی نشاندہی ہونے پر 48 چھاپہ مار کارروائیاں کی گئیں۔
ترجمان ایف آئی اے کے مطابق رواں سال 41 مقدمات درج کر کے 77 ملزمان کو گرفتار کیا گیا جو بغیر لائسنس کرنسی کی ایکسچینج میں ملوث تھے جبکہ40 انکوائریوں میں تفتیش بھی مکمل کی گئی ہے، ملزمان کی گرفتاری کے لئے قانون نافذ کرنے والے اداروں کی معاونت بھی حاصل کی گئی تھی۔
’رواں سال چھاپوں کے دوران مجموعی طور پر کراچی زون نے 39 کروڑ روپے سے زائد مالیت کی ملکی و غیر ملکی کرنسی برآمد کی گئی، برآمد کی گئی کرنسی میں 26 کروڑ 42 لاکھ سے زائد پاکستانی روپے سمیت 3 لاکھ 27 ہزار 16 امریکی ڈالر، 4 کروڑ 22 لاکھ روپے سے زائد مالیت کی دیگر غیر ملکی کرنسی بھی شامل ہے۔‘
ترجمان ایف آئی اے کے مطابق غیر ملکی کرنسی کی اسمگلنگ میں ملوث عناصر کے خلاف ٹھوس شواہد کی روشنی میں قرار واقعی سزائیں دلوائی جائیں گی، غیر قانونی کرنسی کی خریدوفروخت میں ملوث بین الاقوامی ایجنٹوں کے خلاف بھی گھیرا تنگ کیا جائے۔
