فلموں اور ڈراموں میں عموماً اداکاروں کی ایک جیسے کرداروں کے روپ میں روایتی اداکاری سے ناظرین یوں تو اکثر نالاں رہتے ہیں مگر کسی ڈرامے میں اداکاروں کی ’وارڈروب چوائس‘ کی یکسانیت بھی انہیں اس قدر بور کردیتی ہے کہ وہ اپنے غصے کے اظہار کے لیے سوشل میڈیا پر رد عمل دینے کی حد تک چلے جاتے ہیں۔
یوں تو ناظرین بیشتر ڈراموں میں اداکاروں کے ڈریسنگ سینس کو تنقید کا نشانہ بناتے رہتے ہیں لیکن اب کی بار نجی ٹی وی اے آر وائے ڈیجیٹل پر نشر ہونے والے ڈراما سیریل ’سکون‘ میں ناظرین کو اداکارہ ثنا جاوید کی اداکاری سے زیادہ ان کے کپڑوں کی یکسانیت نے بور کررکھا ہے، یہی وجہ ہے کہ وہ متعدد اقساط میں ایک ہی سوٹ پہننے پر ثنا جاوید ان کو تنقید کا نشانہ بنا رہے ہیں۔
سوشل میڈیا کا سہارا لیتے ہوئے صارفین نے ثنا جاوید کا گزشتہ چند اقساط سے ایک ہی سوٹ دیکھ کر اکتاہٹ کا اظہار کرتے ہوئے اس میں تبدیلی کا مطالبہ داغ دیا ہے۔
ایک صارف نے لکھا کہ شائقین ڈرامے کے کردار ہمدان سے مطالبہ کر رہے ہیں کہ وہ عینا کا کردار نبھانے والی اداکارہ ثنا جاوید کو نیا لباس خرید دیں کیونکہ انہوں نے قسط 8 سے 15 تک نیلے رنگ کا ایک ہی لباس پہنے رکھا ہے۔
ایک صارف نے مذاق اڑاتے ہوئے لکھا کہ اب تو کپڑوں میں سے بُو آ گئی ہوگی اس لیے یہ تبدیل کر لیں۔
کسی نے کہا کہ اب تو اداکارہ بارش میں بھی بھیگ چکی ہیں اب تو کپڑے تبدیل کردیں تو کسی نے طنزاً لکھا کہ سب کچھ عارضی ہے لیکن 3 اقساط سے مسلسل پہنا گیا ثنا جاوید کا سوٹ مستقل ہی رہے گا۔
واضح رہے کہ اس ڈرامے میں ثنا جاوید، احسن خان، خاقان شاہنواز، عدنان صمد اور سدرہ نیازی مرکزی کردار نبھا رہے ہیں جبکہ معاون اداکاروں میں عثمان پیر زادہ، عتیقہ اوڈھو، لیلیٰ واسطی، احسن تابش اور قدسیہ علی شامل ہیں۔
