شاہراہ قراقرم پر داسو کے مقام پر لینڈ سلائڈنگ کے باعث راولپنڈی سے اسکردو جانے والا ٹرک حادثے کا شکار ہوگیا جس کے نتیجے میں 2 افراد جاں بحق ہوگئے۔
پولیس ذرائع کے مطابق وہ ایک چھوٹا مال بردار ٹرک تھا جسے اپر کوہستان کے علاقے لوٹر تھانہ کے قریب شاہراہ قراقرم پر حادثہ پیش آیا ہے۔
گاڑی میں سوار 2 افراد شدید زخمی ہوئے جنہیں طبی امداد کے لیے قریبی اسپتال پہنچایا گیا تاہم دونوں زخموں کی تاب نہ لاتے ہوئے دم توڑ گئے۔
حادثے کے پیش نظر شاہراہ قراقرم جزوی طور پر ہر قسم کے ٹریفک کی آمدورفت کے لیے بند کردی گئی ہے اور شاہراہ پر گاڑیوں کی طویل قطاریں جمع ہیں۔
دونوں جاں بحق افراد کا تعلق اسکردو کی تحصیل روندو سے بتایا جارہا ہے جو ٹرک راولپنڈی سے مرغیاں لے کر گلگت بلتستان جا رہے تھے۔
