معروف لالی ووڈ اداکارہ ریشم نے سجل علی اور احد رضا میر کی علیحدگی کی تصدیق کرتے ہوئے کہا کہ سجل علی سے میرا بہت پیار ہے اور اسکی اداکاری مجھے بہت پسند ہے، میں بہت افسردہ ہوئی جب مجھے علم ہوا کہ ان کی طلاق ہو چکی ہے۔ انہوں نے عمران اشرف اور کرن اشفاق کی علیحدگی پر بھی افسوس کا اظہار کیا۔
اداکارہ ریشم، یوٹیوبر ملیحہ رحمان کے پوڈ کاسٹ میں مہمان تھیں۔ شو کے دوران انہوں نے انڈسٹری میں طلاقوں کی بڑھتی شرح پر بات کرتے ہوئے کہا کہ انڈسٹری میں مسلسل طلاقیں انہیں اداس اور خوفزدہ کررہی ہیں۔
مزید پڑھیں
انہوں نے کہا کہ وہ سجل کے بہت قریب ہیں اور دونوں نے محبت جائے بھاڑ میں ایک ساتھ کام کیا ہے۔ سجل علی کی طلاق نے انہیں واقعی اداس کر دیا ہے۔ انہوں نے عمران اشرف کا بھی نام لیا اور کہا کہ وہ ان سے اور ان کی سابق اہلیہ کرن اشفاق حسین سے ایک تقریب میں ملی تھیں اور وہ اچھے لگ رہے تھے۔ اس کی طلاق کی خبر نے بھی بہت اداس کیا ہے۔
انہوں نے تنہا رہنے اور آگے آنے والی زندگی میں لائف پارٹنر کو تلاش کرنے کے بارے میں بھی بات کرتے ہوئے کہا کہ اگر انہیں بہت عرصہ پہلے کوئی اچھا جیون ساتھی مل جاتا تو وہ شوبز چھوڑ دیتی لیکن وہ اب بھی کسی ایسے شخص سے شادی کرنا چاہیں گی جو وفادار اور بہترین کمپنی دے سکتا ہو۔
واضح رہے ریشم لالی وڈ کی معروف اداکارہ رہ چکی ہیں، انہوں نے فلمی دنیا اور پھر ڈرامہ انڈسٹری پر راج کیا، انہوں نے اپنے کیرئیر میں بہت سی فلمیں کی ہیں لیکن جب فلموں کا زوال شروع ہوا تو انڈسٹری چھوڑ دی۔ لیکن وہ جلد ہی احمد علی اکبر کے ساتھ فلم گنجال میں مکمل طور پر سلور اسکرین پر واپسی کریں گی۔
