سعودی وزارت حج وعمرہ نے اعلان کیا ہے کہ عمرہ زائرین کو خدمات کی فراہمی اور بعض ذمہ داریوں میں کوتاہی برتنے والی متعدد عمرہ کمپنیوں کے لائسنس منسوخ کردیے جائیں گے۔
سعودی اخبار کے مطابق وزارت حج وعمرہ کی جانب سے جاری بیان میں کہا گیا ہے کہ قصور وارعمرہ کمپنیوں سے متعلق ذمہ داریوں میں کوتاہی کے ثبوت ملنے پران کے خلاف مناسب سزاؤں کا فیصلہ کیا جائے گا۔
وزارت حج وعمرہ نے اس سے قبل متنبہ کیا تھا کہ زائرین کی خدمت میں کسی بھی قسم کی کوتاہی برداشت نہیں ہوگی، کوتاہی برتنے والی کمپنی کے خلاف تادیبی کارروائی ہوگی اور زائرین کے حقوق کا تحفظ کیا جائے گا۔
وزارت حج وعمرہ نے کہا کہ عمرہ خدمات فراہم کرنے والی کمپنیوں کی کارکردگی کا جائزہ لینے کے لیے تفتیشی دورے ہوں گے، اگرعمرہ زائرین کی جانب سے کسی کمپنی کے خلاف شکایت موصول ہوئی تو اس کے خلاف کارروائی کی جائےگی۔ وزارت حج وعمرہ نے داخلی اوربیرونی زائرین سے کہا ہے کہ وہ پرمٹ ہولڈرزعمرہ کمپنیوں کے ذریعے ہی عمرہ پروگرام بنائیں۔
