جمعہ مبارک ہیش ٹیگ کے ساتھ سماجی رابطہ کی ویب سائٹ پر امریکی کونسلیٹ پشاور کی جانب سے جاری کردہ ٹوئیٹ میں بتایا گیا ہے کہ امریکی سفیر ڈونلڈ بلوم نے شاندار تاریخی اہمیت کی حامل مسجد مہابت خان کا دورہ کیا ہے۔
’ امریکی سفیر نے پشاور شہر کے وسط میں قائم اس عظیم الشان مسجد کی شاندار تاریخ دریافت کی۔‘
مسجد پہنچنے پر امریکی سفیر کو خطیب مسجد مولانا طیب قریشی نے خوش آمدید کہا اور انہیں مسجد کے مختلف حصوں سمیت مسجد میں جاری تعمیرات اور بحالی کے کام سے بھی آگاہ کیا۔
امریکی حکومت کی جانب سے اس تاریخی ورثہ کے تحفظ کی کوششوں کا ذکر کرتے ہوئے امریکی کونسلیٹ نے اسلامی فن تعمیر میں دلچسپی رکھنے والوں کو اس مسجد کو ہر صورت دیکھنے کی سفارش بھی کی ہے۔
#JummahMubarak! Ambassador Blome visited the stunning Mahabat Khan Mosque in the heart of Peshawar city to explore its rich history. Supported by a U.S. govt conservation project, it’s a must-visit for those interested in Islamic architecture. #MahabatKhanMosque @HeritageAtState pic.twitter.com/A3sPYrhou5
— U.S. Consulate Peshawar (@USCGPeshawar) March 3, 2023
پشاور شہر کے وسط میں واقع مسجد مہابت خان تقریباً چار سو سال پہلے مغل فرماں روا شاہجہان کے گورنر نواب مہابت خان نے تعمیر کروائی تھی۔
امریکی کونسلیٹ کی جانب سے ٹوئٹر پر جاری کردہ تصاویر میں دیکھا جاسکتا ہے کہ امریکی سفیر ڈونلڈ بلوم مسجد میں ایسی جگہ کھڑے ہیں جہاں ان کے عقب میں موجود دیوار پر مغل فن تعمیر سے مزین دیوار کے نقش و نگار ادھڑے ہوئے ہیں۔
آج امریکی سفیر کے دورے کو سراہتے ہوئے ڈپٹی ڈائریکٹرادارہ برائے تحفظ ماحول خیبرپختونخوا حبیب جان نے اسے اہم قرار دیا ۔
ان کے مطابق دونوں ممالک کو مشترکہ دلچسپی کی مختلف جہات میں تعاون اور شراکت کے مواقع تلاش کرنا چاہئیں۔ ’مجھے یقین ہے کہ باہمی تعاون کی بڑی گنجائش ہے۔‘
واضح رہے کہ 2004 میں امریکی سفیر ریان سی کرورکر نے اپنے وفد کے ہمراہ مسجد مہابت خان کا اچانک دورہ کرکے صوبائی حکومت اور مسجد کی انتظامیہ کے درمیان تنازعہ پیدا کردیا تھا۔
اس وقت صوبائی حکومت امریکی سفیر کے اچانک اور خلاف ضابطہ دورے سے نا خوش تھی اور اس وقت مسجد کے خطیب مولانا یوسف قریشی کو اظہار وجوہ کا نوٹس جاری کیا گیا تھا۔
