سابق چیف جسٹس جواد ایس خواجہ نے فوجی عدالتوں میں سویلنز کے ٹرائل کالعدم قرار دینے سے متعلق اپیل پر نئے بینچ کی تشکیل کے لیے ججز کمیٹی کو معاملہ بھجوانے کی درخواست کردی۔
جواد ایس خواجہ نے درخواست سپریم کورٹ میں دائر کی جس میں جسٹس سردار طارق مسعود کی بینچ میں موجودگی پر اعتراض اٹھا تے ہوئے کہا کہ جسٹس سردار طارق مسعود فوجی عدالتوں سے متعلق درخواستوں پر نوٹ میں اپنی رائے دے چکے۔
انہوں نے اپنی درخواست میں کہا کہ جسٹس سردار طارق مسعود خود کو فوجی عدالتوں سے متعلق بنچ سے الگ کر لیں اور فوجی عدالتوں میں سویلنز کے ٹرائل کالعدم قرار دینے سے متعلق اپیل پر نئے بینچ کی تشکیل کے لیے ججز کمیٹی کو معاملہ بھجوایا جائے۔
درخواست میں کہا گیا کہ سپریم کورٹ نے فوجی عدالتوں سے متعلق 9 رکنی بنچ بنایا تھا جس میں جسٹس فائز عیسی اور جسٹس سردار طارق نے سننے سے معذرت کی۔ جسٹس سردار طارق نے 26 جون کو دستخط شدہ نوٹ میں اپنی رائے دے دی تھی۔
جسٹس سردار طارق مسعود ملٹری کورٹس سے متعلق فیصلے میں نہیں بلکہ نوٹ میں اپنی رائے کا اظہار کر چکے ہیں اور انہوں نے جسٹس سردار طارق مسعود نے سویلینز کے فوجی عدالتوں کے خلاف درخواستوں کو ناقابل سماعت قرار دے دیا تھا۔ درخواست میں مزید کہا گیا کہ جسٹس سردار طارق نے کہا تھا کہ قانون کو پہلے ہائیکورٹ میں چیلنج ہونا چاہیے لہٰذا اب فوجی عدالتوں سے متعلق ان کا اپیلوں کو سننا انصاف کے اصولوں کے منافی ہے۔
جواد ایس خواجہ نے استدعا کی کہ جسٹس سردار طارق مسعود کی سربراہی میں قائم بینچ کو انٹراکورٹ اپیلوں پر فیصلہ کرنے سے روکا جائے۔
