نیو جرسی میں ایک بیل نے من مانی پر اترتے ہوئے ذرائع نقل و حمل کو نشانہ بناتے ہوئے پہلے ریل گاڑیوں کے مسافروں کو تاخیر کا سامنا کروایا اور پھر ہوائی اڈے کا رخ کرلیا لیکن بالآخر مقامی انتظامیہ نے اس پر قابو پا ہی لیا۔
مسافروں کو جمعرات کی صبح تقریباً 45 منٹ کی تاخیر ہوئی جب ایک فرار ہونے والا بیل نیوارک پین اسٹیشن پر این جے ٹرانزٹ ٹرین کی پٹڑیوں تک جا دھمکا۔
حکام نے بتایا کہ بیل صبح 10:30 بجے نیوارک انٹرنیشنل ایئرپورٹ کے قریب ایک مقام سے فرار ہوا تھا جس کے بعد وہ پین اسٹیشن پہنچا اور وہاں ٹرانزٹ پٹڑیوں پر دھرنا دے دیا۔
بیل نے ریل گاڑیوں کی آمدورفت درہم برہم کرنے پر ہی اکتفا نہیں کیا بلکہ وہاں سے پھر اس نے ہوائی اڈے کی جانب بھی رخ کرلیا۔ تاہم نیوارک اور پورٹ اتھارٹی کے پولیس افسران نے پٹٹریوں پر ہی جالیا۔
خاصی تگ و دو کے بعد پولیس کی ٹیم اس بیل کو ایک باڑ والی جگہ پر گھیرنے اور پھر اسے ٹرانکوئلائزر کے ذریعے بیہوش کرنے میں کامیاب ہوگئی۔
NJ TRANSIT rail service is subject to up to 45 minute delays between Newark Penn and PSNY, due to Police activity near Newark Penn Station. NJ TRANSIT rail tickets and passes are being cross-honored by PATH and Hoboken, Newark Penn and 33rd Street New York.
Police activity: pic.twitter.com/XrtIEK5ZGH
— NJ TRANSIT (@NJTRANSIT) December 14, 2023
پولیس نے بتایا کہ بیل کی نقل و حمل اور دیکھ بھال کے لیے اسے جانوروں کی ایک مقامی پناہ گاہ کے حوالے کردیا گیا۔
