سابق وزیراعلیٰ پنجاب چودھری پرویزالہٰی نے کہا ہے کہ وہ وقت دور نہیں جب عمران خان ایک بار پھر وزیراعظم پاکستان ہوں گے کیوں کہ موجودہ حکمران عوام کے غیض وغضب سے نہیں بچ سکتے۔
لاہور میں میاں محمودالرشیدا ور وکلاء سے گفتگو کرتے ہوئے چودھری پرویزالہٰی نے کہا کہ عمران خان نے الیکشن مہم کاباقاعدہ آغاز کردیا ہے اور اب ہمارے کارکنان بھی الیکشن مہم کے لیے متحرک ہوجائیں۔
چودھری پرویزالہٰی کا کہنا تھا کہ شہبازشریف نے معیشت کا بیڑا غرق کرکے رکھ دیا ہے ایسی صورت حال میں ملکی مسائل کاواحد حل انتخابات ہیں۔
سابق وزیراعلیٰ پنجاب نے سوال کیا کہ مریم نواز عدلیہ اور اداروں پر تنقید کرکے کیا حاصل کرناچاہتی ہیں؟
واضح رہے کہ چودھری پرویزالہٰی حال ہی میں تحریک انصاف میں شامل ہوئے ہیں اور عام انتخابات میں بلے کے نشان پر انتخابی میدان میں اتریں گے اس سے قبل ق لیگ تحریک انصاف کی اتحادی تھی اور اسی بنیاد پر عمران خان نے چودھری پرویزالہٰی کو وزیراعلیٰ پنجاب کے منصب پربٹھایا تھا۔
