وزیراعظم میاں محمد شہباز شریف امیر قطر کی دعوت پر دوحہ پہنچ گئے۔ وزیراعظم اقوام متحدہ کے زیراہتمام کم ترقی یافتہ ممالک کی کانفرنس میں شرکت کریں گے تاکہ انہیں ترقی و خوشحالی کی راہ پر آگے بڑھنے میں مدد دی جا سکے۔
وزیراعظم کی کانفرنس میں شریک عالمی رہنماؤں اور وفود کے سربراہان سے دو طرفہ ملاقاتیں بھی شیڈول ہیں۔ ترجمان دفترخارجہ کے مطابق امیر قطر کی دعوت پر وزیراعظم محمد شہباز شریف 5 سے 6 مارچ تک دوحہ میں قیام کریں گے۔
امیر قطر کانفرنس میں شریک سربراہان مملکت اور وزرا اعظم کے اعزاز میں استقبالیہ دیں گے ۔ وزیراعظم شہباز شریف امیر قطر کے استقبالیہ میں بھی شرکت کریں گے۔
کانفرنس میں کم ترقی یافتہ ممالک میں پائیدار ترقی کو تیز کرنے کے اقدامات پر غور کیا جائے گا جن سے انہیں خوشحالی کی راہ پر گامزن کرنے میں مدد ملے گی۔ دوحہ میں کانفرنس کے موقع پر وزیراعظم شہبازشریف شریک رہنماؤں اور وفود کے سربراہان سے دو طرفہ ملاقاتیں اور بات چیت کریں گے۔
