الیکشن کمیشن آف پاکستان نے سیاسی جماعتوں کی نئی فہرست جاری کر دی ہے۔
الیکشن کمیشن کی جانب سے جاری کی گئی نئی لسٹ میں پارٹی سربراہان کی فہرست میں بانی پی ٹی آئی کا نام ہٹا دیا گیا ہے اور تحریک انصاف کو بغیر قیادت کے ظاہر کیا گیا ہے۔
اس کے علاوہ پرویز خٹک کی جماعت پی ٹی آئی پارلیمنٹیرینز کو الیکشن کمیشن میں بطور سیاسی جماعت شامل کر لیا گیا ہے۔
الیکشن کمیشن آف پاکستان سے جاری لسٹ کے مطابق اس وقت کل 175 سیاسی جماعتیں رجسٹرڈ ہیں۔
مزید پڑھیں
یاد رہے کہ چیئرمین تحریک انصاف عمران خان کو توشہ خانہ کیس میں سزا کی وجہ سے نئے انٹرا پارٹی انتخابات میں بیرسٹر گوہر خان کو چیئرمین پی ٹی آئی منتخب کیا گیا تھا مگر الیکشن کمیشن آف پاکستان نے پی ٹی آئی کے انٹرا پارٹی انتخابات کالعدم قرار دے دیے ہیں۔
الیکشن کمیشن نے پی ٹی آئی سے بلے کا انتخابی نشان بھی واپس لے لیا ہے۔
عمران خان سزا یافتہ ہونے کی وجہ سے چیئرمین کا عہدہ اپنے پاس نہیں رکھ سکتے تھے اس لیے بیرسٹر گوہر خان کو نیا چیئرمین بنایا گیا تھا مگر الیکشن کمیشن نے پی ٹی آئی کے انٹرا پارٹی انتخابات پر سوالات اٹھاتے ہوئے کالعدم قرار دے دیا ہے۔
پی ٹی آئی انٹرا پارٹی الیکشن کالعدم،ٹیم کو بلے کے بغیر کھیلنا ہوگا
پی ٹی آئی نے الیکشن کمیشن کے فیصلے کو چیلنج کرنے کا اعلان کیا ہے مگر ابھی تک یہ واضح نہیں ہو سکا کہ کس عدالت میں اس فیصلے کے خلاف اپیل کی جائے گی۔
یہ بھی یاد رہے کہ الیکشن کمیشن آف پاکستان کی جانب سے 8 فروری کو دی گئی عام انتخابات کی تاریخ کے تناظر میں آج کاغذات نامزدگی جمع کرانے کا آخری دن تھا، اور اب کل سے 30 دسمبر تک کاغذات کی جانچ پڑتال کی جائے گی۔
چیئرمین پی ٹی آئی عمران خان اس وقت اڈیالہ جیل میں قید ہیں اور ان کا سائفر کیس میں ٹرائل چل رہا ہے۔ اس کے علاوہ 190 ملین پاؤنڈ اسکینڈل اور توشہ خانہ کیس میں بھی ان کو گرفتار کیا گیا ہے۔
