کالا ہیرا جو حقیقت میں سیب ہے؟

یقیناً آپ نے انواع و اقسام کے سبز اور سُرخ سمیت مختلف رنگوں کے سیب دیکھے ہوں گے لیکن دنیا میں ایک خطہ ایسا بھی ہے جہاں کالے رنگ کے سیب اُگتے ہیں۔ ویسے تو اس سیب کا رنگ گہرا بنفشی ہے تاہم یہ دِکھنے میں سیاہ لگتا ہے جس کی وجہ سے اسے انگریزی میں (black diamond apple) کہا جاتا ہے اور یہ صرف تبت میں پایا جاتا ہے۔

کالا ہیرا سیب اپنی پرتعیش کشش اور کمیابی کی بدولت دوسرے سیبوں سے نمایاں ہے اور لوگوں میں تجسس بھی پیدا کرتا ہے۔ بلیک ڈائمنڈ ایپل کا یہ مخصوص رنگ دراصل منفرد جغرافیائی محل وقوع سے منسوب ہے جو چین کے خود مختار خطے تبت میں پہاڑوں کے درمیان واقع چھوٹے سے شہر نینگچی میں واقع ہے۔

زیادہ اونچائی پر پائے جانے والے سیبوں کو دن کے وقت شدید الٹرا وائلیٹ روشنی سے ملتی ہے جس کے باعث اس کے درجہ حرارت میں نمایاں اتار چڑھاؤ آتا رہتا ہے۔ ایسے موسمی حالات سیب کے مخصوص سیاہ رنگ کی تیاری میں معاون ہوتے ہیں۔ اگرچہ بلیک ڈائمنڈ ایپل کا اندرونی حصہ عام سیبوں جیسا ہے تاہم اس کا ذائقہ تمام سیبوں سے زیادہ میٹھا ہوتا ہے۔

کالے ہیرے ’سیب‘ کے فوائد

سیب کی دیگر اقسام کی طرح ، انتہائی غذائیت سے بھرپور کالا ہیرا سیب میں فائبر، وٹامن بی، سی، ایپی کیٹیچن، اینٹی آکسیڈنٹس، فلیونوئیڈز اور وٹامن اے شامل ہیں۔ جو انسانی صحت کے لیے بے حد مفید ہیں۔ اس سیب کی مقبولیت اور اہمیت کا راز یہ ہے کہ یہ پھل قبل از وقت بڑھاپے، جھریوں اور سیاہ دھبوں سے منسلک فری ریڈیکلز کے اثرات سے لڑنے میں مدد دیتا ہے۔