امریکا کے 2 مصروف ترین ایئرپورٹس کی طرف جانے والے راستوں پر فلسطین کے حامی افراد نے ہزاروں کی تعداد میں جمع ہوکر مظاہرے کیے، جس کے نتیجے میں درجنوں افراد کو گرفتار کرلیا گیا ہے۔
فلسطین کے حامی مظاہرین نے بدھ کے روز امریکی ریاست لاس اینجلس کے بین الاقوامی ایئرپورٹ اور نیویارک کے جان ایف کینیڈی بین الاقوامی ایئرپورٹ کے ارد گرد مظاہرے کیے اور سڑکوں پر ٹریفک بلاک کردی۔
لاس اینجلس پولیس ڈیپارٹمنٹ نے بتایا کہ مظاہرین قابو سے باہر ہوگئے تھے، 36 افراد کو حراست میں لیا گیا ہے۔
پولیس نے ایک بیان میں کہا ‘مظاہرین کا پولیس کے ساتھ تصادم ہوا۔ مظاہرین نے ایک پولیس افسر کو دھکا دے کر زمین پر پھینک دیا، تعمیراتی ملبہ، سڑک کے نشانات، درختوں کی شاخوں اور کنکریٹ کے بلاکس کا استعمال کرتے ہوئے ہوائی اڈے کی طرف جانے والی سڑک بند کی اور گاڑیوں میں شامل نہ ہونے والے راہگیروں پر حملہ کیا۔’
بیان کے مطابق حراست میں لیے گئے افراد میں سے زیادہ تر کے خلاف فسادات کے الزامات کے تحت مقدمہ درج کیا گیا ہے اور 1 شخص کو پولیس افسر پر تشدد کے الزام میں گرفتار کیا گیا ہے۔
لاس اینجلس سٹی نیوز سروس نے رپورٹ کے مطابق ایئرپورٹ پولیس نے بتایا ہے کہ کمپلیکس کا داخلی راستہ تقریباً 45 منٹ کے اندر دوبارہ کھول دیا گیا ہے، جہاں مظاہرین کی پولیس سے ‘جھڑپ کا کوئی اثر نہیں ہوا’۔
نیویارک کے پورٹ اتھارٹی پولیس ڈیپارٹمنٹ نے کہا کہ کوئنز میں JFK ایئرپورٹ کے اندر وین وِک ایکسپریس وے کے ساتھ احتجاج کے دوران 26 افراد کو غیر قانونی طرز عمل اور گاڑیوں کی ٹریفک میں رکاوٹ ڈالنے کے الزام میں گرفتار کیا گیا ہے۔
نیوز ایجنسی کے مطابق مظاہرے کے دوران پورٹ اتھارٹی نے 2 ایئرپورٹ کی بسیں روانہ کیں جو مسافروں کو سواریوں کی پیشکش کرتی ہیں جو ٹریفک بیک اپ کے نتیجے میں پھنسے ہوئے مسافروں کو بحفاظت ہوائی اڈے تک پہنچنے میں مدد فراہم کرتی ہیں، تقریباً 20 منٹ کے بعد سڑک کو دوبارہ کھول دیا گیا۔
دونوں مظاہروں کی مقامی خبروں کی کوریج میں مظاہرین نے بینرز اٹھا رکھے تھے جس میں ‘آزاد فلسطین’ اور ‘نسل کشی سے باز آؤ’ جیسے نعرے درج تھے۔
پچھلے 11 ہفتوں کے دوران غزہ کی پٹی میں اسرائیلی فوجی کارروائی کی مخالفت میں یہ مظاہرے اس وقت ہوئے جب اقوام متحدہ کی صحت کی ایجنسی نے اطلاع دی ہے کہ 7 اکتوبر کو حماس کے غزہ سے اسرائیل پر حملے کے بعد سے ساحلی فلسطینی انکلیو میں جاری لڑائی میں ہزاروں افراد انخلا کی کوشش کر رہے ہیں۔
غزہ کی وزارت صحت کے مطابق ہوائی، زمینی اور سمندری راستے سے غزہ پر مسلسل اسرائیلی جوابی حملے جاری ہیں، جس سے 21,000 جان بحق اور 55,000 سے زیادہ زخمی ہو چکے ہیں، جبکہ غزہ کے تقریباً 2.3 ملین افراد کو ان کے گھروں سے نکال دیا گیا ہے۔
