عمران خان کا اڈیالہ جیل سے سندھ کے نوجوانوں کے لیے خصوصی پیغام

پاکستان تحریک انصاف (پی ٹی آئی ) کے بانی چیئرمین عمران خان نے اڈیالہ جیل سے سندھ کے عوام اور نوجوانوں کے نام تحریری پیغام جاری کیا ہے جس میں کہا گیا ہے کہ ’ملک میں نظامِ سیاست و حکومت کی اصلاح و تبدیلی کی سب سے زیادہ ضرورت سندھ کے عوام کو ہے۔

پاکستان تحریک انصاف کے مرکزی میڈیا ڈیپارٹمنٹ کی جانب سے جاری بیان میں کہا گیا ہے کہ عمران خان نے اپنے تحریری پیغام میں لکھا ہے کہ ’ ایک کرپٹ، حریص اور جرائم پیشہ خاندان کے زیرِ تسلّط سندھ کے شہر کھنڈرات کی تصویر پیش کرتے ہیں، سندھ کی تعمیر و ترقی میں سب سے بڑی رکاوٹ یہی ایک خاندان ہے۔

عمران نے کہا کہ ’ اس بے رحم خاندان کی قیام اور تفریح گاہیں بیرونِ ملک ہیں جہاں سے یہ صوبے کو لوٹنے آتے ہیں، سندھ کے عوام کا پیسہ لوٹ کر یہ خاندان امارات میں عیش کرتا ہے جبکہ اہلِ سندھ بنیادی وسائل کے لیے ترستے ہیں۔

عمران خان نے تحریری پیغام میں یہ بھی لکھا گیا ہے کہ ’ اپنے ظالمانہ راج کو برقرار رکھنے کے لیے یہ خاندان صوبے کو پسماندہ، اس کے شہر و دیہات کو ترقی و سہولیات سے محروم رکھتا اور سرمایہ کاروں کو خوفزدہ کرتا ہے۔

بقول عمران خان کے اس مجرم خاندان کی وجہ سے مقامی کاروباری حضرات بھی پیسہ باہر منتقل کرنے پر مجبور ہیں، ان کی بدانتظامی اور بے رحم راج کے باعث محض 6 برس کی مدت میں کم و بیش 10.4 ارب ڈالرز دبئی منتقل ہوئے ہیں۔

عمران خان نے مزید لکھا کہ ملک بھر کیطرح سندھ میں بھی سیاسی شعور اپنی بلندیوں کو چھو رہا ہے اور صوبے کے عوام اس خاندان سے دائمی نجات کے لیے تیار ہیں۔سندھ کے نوجوان اپنے مستقبل کے لیے آگے آئیں اور قیادت کا فریضہ سرانجام دیں۔

ان کا کہنا ہے کہ ’ملک بھر کی طرح سندھ میں بھی نوجوانوں کو عوامی نمائندگی و قیادت کا ذمہ سونپیں گے اور بڑی تعداد میں نئے چہروں کو انتخابی میدان میں اتاریں گے،  8 فروری کو اہلِ سندھ خوف کی زنجیریں توڑ کر نکلیں اور اپنے ووٹ کو اپنے مستقبل کا ضامن و محافظ بنائیں۔

عمران خان کے تحریری بیان میں مزید کہا گیا ہے کہ ’اہلِ سندھ خصوصاً نوجوانوں نے دھاندلی کی راہ روک لی تو تحریک انصاف ہی میدان مارے گی اور سندھ تعمیر و ترقی کی شاہراہ پر گامزن ہوگا، ان شاء اللہ۔