کراچی میں غیر قانونی موبائل فونز کے آئی ایم ای آئی نمبر تبدیل کرنے میں ملوث 2مبینہ ملزمان کو گرفتار کرکے موبائل فونز، مشینز اور ڈیوائسز برآمد کرلی گئیں۔
ترجمان ایس ایس پی ملیر کے پیر کو جاری کردہ اعلامیہ کے مطابق شاہ لطیف ٹائون پولیس نے خفیہ اطلاع پر کارروائی کرتے ہوئے غیر قانونی موبائل فونز کے آئی ایم ای آئی نمبر تبدیل کرنے میں ملوث 2مبینہ ملزمان کو گرفتارکرلیا اور ان کے قبضے سے چوری شدہ موبائل فونز، مشینز اور ڈیوائسز برآمد کیں۔ گرفتار ملزمان میں شہباز اور وقاص شامل ہیں۔
دوسری جانب قائدآباد پولیس نے سی سی ٹی وی فوٹیج کی مدد سے کارروائی کرتے ہوئے ایک اسٹریٹ کرمنل میر عالم کوگرفتار کرکے ایک غیر قانونی پسٹل بمعہ راؤنڈ ، موٹرسائیکل اور دیگر سامان برآمدکرلیا۔
گرفتار ملزم اپنے ساتھیوں کے ہمرہ 29 دسمبر کو گلشن بونیر قائدآباد کی حدود میں ایک شہری سے اسلحہ کے زور پر موٹرسائیکل ،موبائل فون اور دیگر قیمتی سامان چھین کر فرار ہوگیا تھا۔ پولیس نے ملزمان کے خلاف مقدمات درج کرکے مزید تفتیش کا آغاز کردیا ہے۔
