پشاور ہائیکورٹ نے پاکستان تحریک انصاف کے مرکزی رہنما و سابق وفاقی وزیر مراد سعید کی عبوری ضمانت کی درخواست پر فیصلہ محفوظ کر لیا ہے۔
پشاور ہائیکورٹ کے جج جسٹس اعجاز خان نے سابق وفاقی وزیر مراد سعید کی مقدمات کی تفصیل اور عبوری ضمانت درخواست پر سماعت کی۔
اس موقع پر درخواست گزار کے وکیل شاہ فیصل ایڈووکیٹ نے موقف اختیار کیاکہ پولیس مراد سعید کے گھر پر چھاپے مار رہی ہے اور ان کو ہراساں کیا جارہا ہے۔
مزید پڑھیں
وکیل نے کہاکہ مراد سعید کے گھر والوں کو بھی ہراساں کیا جا رہا ہے، درخواست گزار عدالت میں سرینڈر کرنا چاہتا ہے، لیکن ہمیں عدالت تک رسائی نہیں دی جا رہی۔
ہائیکورٹ کے جج جسٹس اعجاز خان نے ریمارکس دیے کہ اگر ایف آئی درج ہے تو یہ پولیس کا اختیار ہے کہ وہ گرفتاری عمل میں لائے، ہائیکورٹ نے ایک آرڈر دیا تھا وہ سپریم کورٹ نے معطل کردیا۔
جسٹس اعجاز خان نے درخواست گزار کے وکیل سے استفسار کیاکہ اس وکالت نامے پر دستخط کس کے ہیں۔
بعد ازاں عدالت نے مراد سعید کی عبوری ضمانت کی حد تک فیصلہ محفوظ کرتے ہوئے تمام فریقین سے ایک ہفتے میں جواب طلب کر لیا۔
واضح رہے کہ مراد سعید سانحہ 9 مئی کے بعد سے روپوش ہیں، پی ٹی آئی رہنما اس وقت پولیس کو کئی کیسز میں مطلوب ہیں۔
