بھارتی کرکٹ ٹیم کے سابق کپتان اور اسٹار کرکٹر ویرات کوہلی نے ذاتی وجوہات کی بنا پر افغانستان کے خلاف پہلے ٹی ٹونٹی میچ میں حصہ لینے سے انکار کردیا۔
بھارت کے ہیڈ کوچ راہول ڈریوڈ نے ویرات کوہلی کی پہلے ٹی ٹونٹی میچ میں عدم شرکت کی تصدیق کی اور کہا کہ وہ اندور اور بنگلور میں ہونے والے سیریز کے بقیہ دو ٹی ٹونٹی میچوں میں شرکت کر سکیں گے۔
بھارتی میڈیا کی رپورٹس کے مطابق ویرات کوہلی نے ذاتی وجوہات کی بنا پر افغانستان کرکٹ ٹیم کے خلاف میچ کھیلنے سے انکار کیا اور آج ان کی بیٹی وامیکا کوہلی کی تیسری سالگرہ ہے، یہی وجہ ہے کہ انہوں نے میچ میں شرکت کرنے سے معذرت کرلی ہے۔
ویرات کوہلی اور انوشکا شرما کی بیٹی وامیکا کوہلی آج اپنی تیسری سالگرہ منا رہی ہیں۔ اس موقع پر بالی وڈ اداکارہ انوشکا شرما نے اپنے انسٹاگرام سٹوری پر بیٹی وامیکا کے ساتھ تصاویر شیئر کیں۔
واضح رہے کہ بھارت اور افغانستان کی کرکٹ ٹیموں کے درمیان 3میچوں پر مشتمل ٹی ٹونٹی سیریز کا پہلا میچ آج موہالی میں کھیلا جائے گا۔
