پاکستان پیپلز پارٹی (پی پی پی) نے بالآخر کراچی میں اپنی سیاسی مہم تیز کر دی ہے، گزشتہ روز سے آصف علی زرداری کی صاحبزادی آصفہ بھٹو زرداری کراچی کے مختلف مقامات کے دوروں میں مصروف ہیں، ان کا یہ سفر گزشتہ روز چنیسر گوٹھ میں خواتین کنونشن سے شروع ہوا تھا۔
آصفہ بھٹو زرداری آج کہاں جائیں گی؟ اس سے میڈیا بلکل بے خبر تھا، میڈیا نے اپنے ذرائع سے یہ تو پتا چلا لیا کہ وہ آج کراچی میں نکلیں گی لیکن جگہ کا معلوم نہ ہونے کے باعث میڈیا نمائندگان مختلف مقامات پر موجود رہے۔
مزید پڑھیں
آصفہ بھٹو زرداری کی کیماڑی آمد
آصفہ بھٹو زرداری نے سیکیوریٹی خطرات کے سبب پیپلز پارٹی کے امیدوار عبدالقادر پٹیل اور آصف خان کے حلقہ کا دورہ خاموشی سے کرنا چاہا لیکن جب وہ مرکزی الیکشن آفس سے ایک جلوس کی شکل میں آئیں تو اس موقع پر کیماڑی کے رہائشیوں نے پھولوں کی پتیاں نچھاور کیں اور نعرے لگا کر ان کا استقبال بھی کیا۔
آصفہ بھٹو زرداری کیماڑی میں قائم پیپلز پارٹی کے مرکزی الیکشن آفس کے سامنے سے آئیں اور زیادہ دیر نا رک سکیں، گاڑی کی سن روف سے باہر نکلیں اور کارکنوں کے نعروں کا ہاتھ ہلا کر جواب دیتی رہیں، پرجوش کارکنان جیے بھٹو اور وزیر اعظم بلاول کے نعرے لگاتے رہے، آصفہ بھٹو کیماڑی ضلع کا ایک راؤنڈ لگاتے ہوئے واپس روانہ ہو گئیں۔
