پاکستان تحریک انصاف (پی ٹی آئی) کے سینیئر رہنما فیصل جاوید انتخابات سے ایک روز قبل منظر عام پر آ گئے ہیں۔
فیصل جاوید 9 مئی کے واقعات کے بعد سے روپوش ہیں، تاہم انہوں نے پاکستان تحریک انصاف کے ورچوئل جلسوں میں شرکت کی تھی۔
نامعلوم مقام سے اپنے ایک ویڈیو پیغام میں فیصل جاوید نے کہاکہ ہمارے کپتان عمران خان کو جس وقت کا انتظار تھا وہ آگیا ہے، اس لیے آپ نے پاکستان اور اپنی آنے والی نسلوں کے لیے ووٹ کاسٹ کرنے کے لیے نکلنا ہے۔
عمران خان نے اپنی پوری زندگی وقف کردی اس قوم کے لیے اور اب ہم نے کیا وقف کرنا ہے صرف ایک ووٹ #ووٹ_ڈالو_خان_نکالو@FaisalJavedKhan pic.twitter.com/SaEbxZPbCf
— PTI (@PTIofficial) February 7, 2024
انہوں نے کہاکہ عمران خان نے کبھی بھی اپنی قوم کو مایوس نہیں کیا اور اب یہ قوم بھی اپنے کپتان کو مایوس نہیں کرے گی۔
فیصل جاوید نے عوام سے اپیل کرتے ہوئے کہاکہ آپ نے اپنے لیے، پاکستان کے لیے اور اپنی آنے والی نسلوں کے لیے تحریک انصاف کے امیدواروں کو جتوانا ہے کیونکہ یہ قومی فریضہ ہے۔
مزید پڑھیں
انہوں نے کہاکہ عمران خان نے اپنی ساری زندگی قوم کے لیے وقف کی ہوئی ہے جس کے بدلے میں قوم نے صرف ایک ووٹ وقف کرنا ہے۔
فیصل جاوید نے اپنے کارکنوں سے اپیل کرتے ہوئے کہاکہ آپ نے اپنا شناختی کارڈ نمبر 8300 پر بھیجنے کے بعد تحریک انصاف کے ذمہ داران کو تفصیل بھیجنی ہے جو تفصیل بتا دیں گے کہ آپ کے حلقے میں پی ٹی آئی کا امیدوار کون ہے۔
واضح رہے کہ پاکستان میں عام انتخابات کے لیے پولنگ کل 8 فروری کو ہوگی لیکن عمران خان انتخابی دوڑ سے باہر ہیں اور پارٹی نشان چھن جانے کے بعد تحریک انصاف کے امیدوار آزاد حیثیت میں الیکشن میں حصہ لے رہے ہیں۔
