چیئرمین واپڈا لیفٹیننٹ جنرل (ر) سجاد غنی محکمہ کے تمام دفاتر میں قائداعظم محمد علی جناح کے ساتھ دکھائی دیا کرتے کیوں کہ ان کے پرنسپل اسٹاف آفیسر نے محکمہ کے تمام دفاتر میں قائد اعظم کے برابر ہی چیئرمین کی تصویر لگانے کا حکم صادر کیا تھا لیکن وزیر اعظم نے اس بات کا نوٹس لیتے ہوئے محمکہ کو ایسی کسی حرکت سے باز رہنے کا کہہ دیا۔
واپڈا کو ہدایت جاری کی گئی ہے کہ قائد اعظم کی تصویر ہر دفاتر میں نمایاں ترین جگہ پر آویزاں کی جائے۔
یاد رہے کہ آج ہی کے دن سجاد غنی کے پرنسپل اسٹاف آفیسر بریگیڈیئر (ر) متین احمد مرزا کی جانب سے چیف ایگزیکٹو افسران، جنرل مینیجرز اور مینیجنگ ڈائریکٹز کو ہدایت جاری کی گئی تھی کہ اپنے تمام پراجیکٹس اور دفاتر میں بانی پاکستان قائداعظم محمد علی جناح کے ساتھ چیئرمین واپڈا کی تصویر بھی آویزاں کی جائے۔
چیئرمین واپڈا کے پرنسپل اسٹاف آفیسر کا یہ حکم نامہ سوشل میڈیا پر وائرل ہوگیا اورجس پر صارفین نے دلچسپ تبصرے بھی کیے۔ ایک ٹوئٹر صارف نے لکھا کہ شکر ہے یہ نہیں کہا گیا کہ چیئرمین کی تصویر بڑے سائز میں کرکے لگائی جائے۔ اس کے علاوہ ایک اور صارف نے لکھا کہ شکر ہے کہ چیئرمین کی تصویر واپڈا کے ہرکھمبے پر لگانے کے احکامات نہیں دیے گئے۔
ایک ٹوئٹر صارف ڈاکٹر حامد بٹ نے نوٹس شیئرکرتے ہوئے لکھا کہ چیئرمین واپڈا چاہتے ہیں تمام دفاتر میں قائداعظم کےساتھ ان کی تصویر لگائی جائے تو پوچھنا یہ تھا کہ قائداعظم محمد علی جناح کے ساتھ علامہ اقبال کی تصویر زیادہ مناسب رہے گی یا چیئرمین واپڈا کی؟
چئیرمین واپڈا لیفیننٹ جنرل ریٹائرڈ سجاد غنی چاہتے ہیں کہ تمام دفاتر میں قائداعظم کے ساتھ ان کی تصویر بھی لگائی جائے۔
سوال ہے کہ قائدآعظم کی تصویر کیساتھ علامہ اقبال کی تصویر زیادہ مناسب رھے گی یا پھر چئیرمین واپڈا کی؟ pic.twitter.com/6C58Lv7Lnz— Dr.Hamid Butt (@HamidButtOffic1) March 10, 2023
ایک اور صارف محسن اقبال نے کہا کہ قائداعظم محمد علی جناح کی تصویر کے ساتھ چیئرمین واپڈا کی تصویر لگانے سے پورے ملک کے شہر اتنے ٹھنڈے اور روشن ہوجائیں گے کہ گرمیوں میں عوام کو لوڈشیڈنگ کا احساس تک نہیں ہوگا ۔
چئیرمین واپڈا کی تصویر بھی قائدِ اعظم کی تصویر کے ساتھ لگانے سے پورے ُملک کے شہر اتنے روشن اور ٹھنڈے ہو جائیں گے کہ گرمیوں میں عوام کو لوڈ شیڈنگ کا احساس تک نہیں ہو گا۔
گرمیوں کا موسم شروع ہوتے ہی عوام کی فلاح کیلئے انتہائی احسن قدم۔ pic.twitter.com/IfnNdXq2Id— Mohsin Iqbal (@mohsiniqbal123) March 9, 2023
اس حوالہ سے وی نیوز سے خصوصی گفتگو کرتے ہوئے چیئرمین واپڈا لیفٹیننٹ جنرل (ر) سجاد غنی نے کہا کہ محکمہ کے بعض دفاتر میں قائد اعظم محمد علی جناح کی تصویر نہیں لگی ہوئی تھی جس پر احکامات جاری کیے کہ بانی پاکستان کی تصویر آویزاں کی جائے اور یہ تو سرکاری پروٹوکول ہے کہ قائد اعظم کی تصویر کے ساتھ محکمہ کے سربراہ کی تصویر بھی لگائی جاتی ہے۔
اس حکمنامہ کے وائرل ہونے اور اس پر سوشل میڈیا پر کڑی تنقید سامنے آنے کے بعد وزیراعظم آفس کی ہدایت پر چیئرمین واپڈا نے یہ حکمنامہ معطل کردیا۔
