پاکستان ایکس سروس مین سوسائٹی (پی ای ایس ایس) نے اعلان کیا ہے کہ حال ہی میں ان کے پلیٹ فارم کو ایک ریٹائرڈ افسر اور مفرور یو ٹیوبرنے ہائی جیک کر لیا تھا۔
پی ای یس ایس کے عہددیداروں نے پریس کانفرنس کے دوران ریٹائرڈ میجر عادل راجا کا نام لیے بغیر کہا کہ وہ سابق افسر جسے فوج نے ملازمت سے برخاست کردیا تھا بیرون ملک بیٹھ کر سوسائٹی کو ذاتی فائدے کے لیے ریاست اور مسلح افواج کے خلاف استعمال کر رہا ہے۔
انہوں نے کہا کہ پاکستان ایکس سروس مین سوسائٹی تینوں مسلح افواج کے سابق اہلکاروں کی رجسٹرڈ فلاحی تنظیم ہے اور اس کے منتخب صدر لیفٹیننٹ جنرل عبدالقیوم (ریٹائرڈ) اور سینیئر نائب صدر وائس ایڈمرل عبدالعلیم (ریٹائرڈ) ہیں۔
مزید پڑھیں
عہدیداروں نے ریاست اور مسلح افواج کے خلاف مہم کی شدید مذمت کرتے ہوئے کہا کہ وہ سابق افسر یو ٹیوب پر ویورشپ بڑھا کر پیسہ کمانے کے لیے ایک سیاسی جماعت کے سیاسی کارکن کا لبادہ اوڑھے ہوئے ہے اور فوج کی قیادت پر حملہ کرنے کی اس کی کوشش دشمن کے عزائم کے عین مطابق ہے۔
سابق فوجی افسر کے بھارتی خفیہ ایجنسی سے روابط کی ’تصدیق‘ ہوچکی
انہوں نے کہا کہ اس برطرف سابق فوجی افسر کے بھارتی خفیہ ایجنسی را اور بھارت کے ساتھ روابط کی بھی تصدیق ہو چکی ہے۔
پی ای ایس ایس کے عہدیداروں نے کہا کہ ہم مسلح افواج اور قانون نافذ کرنے والے اداروں کو سیکیورٹی چیلنجز کے باوجود عام انتخابات 2024 کے کامیاب انعقاد پر خراج تحسین پیش کرتے ہیں۔