پاکستان تحریک انصاف کے رہنما اور نومنتخب رکن اسمبلی شیرافضل مروت نے دعویٰ کیا ہے کہ کل پاکستان پیپلز پارٹی کے سربراہ آصف علی زرداری نے پی ٹی آئی سے تؤرابطے کی کوشش کرتے رہے تھے۔
شیرافضل مروت نے میڈیا سے گفتگو کرتے ہوئے دعویٰ کیا کہ آصف زرداری کل شب تک مجھ سے رابطے کی کوشش کر رہے تھے،
شیر افضل نے یہ بھی دعویٰ کیا ہے کہ پیپلزپارٹی کا کہنا ہے کہ جو آپ کی سیٹیں ہیں وہ ضابطے کے مطابق واپس لے لیں ہمیں کوئی اعتراض نہیں۔
شیرافضل مروت نے مزید دعویٰ کیا کہ پیپلزپارٹی نے واضح کیا ہے کہ ہماری ترجیح ن لیگ کے بجائے پی ٹی آئی ہے۔
تحریک انصاف کے رہنما کے مطابق بانی پی ٹی آئی کا دو ٹوک مؤقف ہے کہ مینڈیٹ چرانے والو کے ساتھ مل کر حکومت سازی نہیں کرسکتے۔
شیرافضل مروت کا کہنا ہے کہ ضرورت پڑی تو بانی پی ٹی آئی احتجاج کی کال دیں گے، 9 مئی دوبارہ ہو یا 10 بار ہو عوام کا حق ان کو دلائیں گے۔
شیرافضل مروت کے مطابق شانگلہ میں امیر مقام کو جعلی طریقے سے جتوایا گیا، فارم 45 کے مطابق ہمارے امیدوار نے 64 ہزار،امیر مقام نے 45 ہزار ووٹ لیے، کے پی میں ہم سے 8 صوبائی اور 3 قومی حلقے چھینے گئے جبکہ بلوچستان میں ہم سے قومی اسمبلی کے 7 اور صوبائی اسمبلی کے 23 حلقے چھینے گئے۔
تحریک انصاف کے رہنما کے مطابق علی امین کا انتخاب بانی پی ٹی آئی کا دانشمندانہ فیصلہ ہے، علی امین کی تمام املاک قرق کی جاچکی ہیں،62 کے لگ بھگ مقدمات ہیں، پی ٹی آئی علی امین کے ساتھ کھڑی ہے اور کھڑی رہے گی۔
